რუსებმა იპოვეს აზოვსტალის მოღალატე ყოფილი თანამშრომელი, რომელმაც მათ საწარმოს საიდუმლო მიწისქვეშა შესასვლელები აჩვენა. ოკუპანტებს ახლა შტურმი ამ გვირაბებზე მიაქვთ. ამის შესახებ მედიას უკრაინის შინაგან საქმეთა მინისტრის მრჩეველმა, ანტონ გერაშჩენკომ განუცხადა.
„არამზადა რუსებმა ქარხნის თანამშრომლებს შორის იპოვეს მოღალატე, რომელიღაც ელექტრიკოსი. მან აჩვენა გვირაბები, რომლებიც მიწისქვეშ გადის ქარხნის ტერიტორიაზე. მოღალატისგან მიღებული ინფორმაციის საფუძველზე, გუშინ რუსებმა ამ გვირაბებზე დაიწყეს შტურმი“, – განაცხადა გერაშჩენკომ.
მან ხაზგასმით აღნიშნა, რომ სწორედ ამიტომ მარიუპოლში მოულოდნელად ჩავიდა რუსი პროპაგანდისტი ვლადიმერ სოლოვიოვი.
„მას [სოლოვიოვს] დაჰპირდნენ, რომ არამზადა რუსები „აზოვსტალზე“ შტურმს მიიტანდნენ და ის შეძლებდა გადაეღო უკრაინელ მცველებზე „გამარჯვება“. გუშინ ეს არ მოხდა, ჩვენი მებრძოლები აზოვსტალის ტერიტორიის დაცვას აგრძელებენ“, – ხაზგასმით აღნიშნა გერაშჩენკომ.
აზოვის პოლკის მეთაურმა, პოდპოლკოვნიკმა დენის პროკოპენოკომ წუხელ გაავრცელა ვიდეომიმართვა, სადაც მან თქვა, რომ აგრძელებენ წინააღმდეგობის გაწევას. გუშინ უკრაინის მაღალი თანამდებობის პირებმა განაცხადეს, რომ ქარხანას ბომბავდნენ ციდან, ხმელეთიდან და ზღვიდანაც. ასევე, შეტაკებებში მონაწილეობდა არტილერია.
გუშინ, 4 მაისს, რამდენიმე საათის განმავლობაში უკრაინის ხელისუფლება აცხადებდა, რომ აზოვსტალის მებრძოლებთან კავშირი დაიკარგა. საღამოს საათებში კი განაცხადეს, რომ კავშირი აღდგა.
___
მთავარი ფოტო: უნიანი. აზოვსტალი
