ფოტო, რომელზეც ბავშვის ზურგზე დაწერილი სახელი და გვარი, ტელეფონის ნომრები და დაბადების თარიღია ასახული, ბოლო კვირაა სოციალურ ქსელებში ვირუსულად ვრცელდება. „ბიბისიმ“ იპოვა და ჩაწერა ბავშვის დედა, საშა, რომელიც შვილთან ერთად ახლა საფრანგეთშია.
წარწერები ვერას ზურგზე. ფოტო: twitter
ბავშვი, რომელსაც დედამ ზურგზე სახელი და გვარი დააწერა, 2 წლის ვერა მაკოვაა კიევიდან. საშას, ვერას დედას, ეშინოდა, რომ დაბომბვისას თვითონ მოკვდებოდა ან ბავშვი დაიკარგებოდა, ამიტომაც ვერას ზურგზე დააწერა აუცილებელი ინფორმაცია მისი ვინაობის შესახებ და ტელეფონის ნომრები.
„ყველაზე მეტად მეშინოდა, რომ ვერა დაიკარგებოდა ან დავიღუპებოდით და ვერავინ გაიგებდა ვინ იყო,“ – უთხრა ქალმა „ბიბისის“.
საშა მაშინ ფიქრობდა, რომ თუ მოკვდებოდა ან მისი შვილის არც ერთი ნათესავი არ გადარჩებოდა ცოცხალი, ვერას ვინაობა ასე გახდებოდა ცნობილი და ვერა შემდეგში შეძლებდა დედის ანგარიშის პოვნას სოციალურ ქსელებში, რათა ენახა, როგორ გამოიყურებოდნენ მისი მშობლები.
საშამ 2 წლის შვილთან ერთად გაიარა მოლდოვა, რუმინეთი, ბელგია და ახლა საფრანგეთშია. იგი ამბობს, რომ ფსიქოლოგიურად ჯერ კიდევ ვერ გრძნობს თავს მხნედ და მისთვის სახლიდან გასვლაც რთულია, რადგან ნაღმების შიში აქვს.
„ვერა კარგადაა, ძალიან პატარაა იმისთვის, რომ გაიგოს რა ხდება,“ – ამბობს საშა.
2 წლის ვერა საფრანგეთში, სადაც ახლა ის დედასთან ერთად იმყოფება მოხალისეების ოჯახში. ფოტო: instagram
უკრაინული სააგენტო UNIAN-ის ცნობით, ახლა უკრაინაში დედები თავიანთ შვილებს სახელს, გვარს და სხვა მონაცემებს სხეულზე აწერენ, რომ მშობლის დაღუპვის შემთხვევაში ბავშვის ვინაობა ცნობილი იყოს.
