დღეს, 6 ივლისს, საქართველოს ქალაქებში – ბათუმში, ქუთაისში, თელავსა და გორში ჟურნალისტებმა საპროტესტო აქციები გამართეს და ჟურნალისტებზე განხორციელებული ძალადობა დაგმეს. ხელისუფლებას კი მოუწოდეს, შეწყვიტოს კრიმინალების წახალისება და მხარდაჭერა.
ჟურნალისტები მოუწოდებენ საქართველოს ხელისუფლებას და შინაგან საქმეთა სამინისტროს, დაუყოვნებლივ გამოიძიონ 5 ივლისს ჟურნალისტებზე თავდასხმის ფაქტები და დააკავონ ყველა მოძალადე.
ჟურნალისტების საპროტესტო აქცია ბათუმში
გუშინ, 5 ივლისს, თბილისში, თბილისი პრაიდის კვირეულის ფარგლებში დაგეგმილი ღირსების მარშის ჩასაშლელად ჰომოფობიური ჯგუფები რუსთაველის გამზირზე გამოვიდნენ. ძალადობრივმა ჯგუფებმა რუსთაველის გამზირსა და მიმდებარე ქუჩებზე 53 ჟურნალისტს სცემეს. რამდენიმე მათგანი ახლაც საავადმყოფოშია. აგრესიული ადამიანები თავს ესხმოდნენ და ფიზიკურად უსწორდებოდნენ ყველას, ვინც რაიმე ნიშნით – მიკროფონით, კამერითა თუ ფოტოაპარატით – მედიასთან ასოცირდებოდა.
ქალაქის ცენტრში, პოლიციის თანდასწრებით, ჟურნალისტებს უმოწყალოდ სცემდნენ, აგინებდნენ, აპარატურას სტაცებდნენ და უმტვრევდნენ. გარდა მძიმე გამოცდილებისა, რომელიც მედიის წარმომადგენლებმა ძალადობრივი ჯგუფების მოქმედების შედეგად მიიღეს, არაერთი დაზარალებული ხაზს უსვამს უმოქმედობას პოლიციისას, რომელიც 5 ივლისს, მოვლენათა ეპიცენტრში, შესამჩნევად მცირე რაოდენობით იყო წარმოდგენილი.
