ამერიკის ჯანდაცვის ორგანიზაციები აშშ-ს ორმოცდაათ შტატს და რამდენიმე დიდ მეგაპოლისს მიმართავენ, რომ მოემზადონ SARS-COV-2-ს საწინააღმდეგო ვაქცინაციისთვის ნოემბრის დასაწყისში, 3 ნოემბრის ამერიკის საპრეზიდენტო არჩევნებამდე. ეს დოკუმენტი რამდენიმე ამერიკულმა საინფორმაციო საშუალებამაც მიიღო.
ამერიკის დაავადებათა კონტროლის ცენტრები მოითხოვენ, სახელმწიფომ გააკეთოს ყველაფერი იმისთვის, რათა მომავალი ვაქცინის გამანაწილებელ ცენტრებში „ყველაფერი მზად იყოს 2020 წლის პირველი ნოემბრისთვის“, – მისწერა შტატების ხელმძღვანელებს ზემოთ ხსენებული ცენტრების დირექტორმა რობერტ რედფილდმა. გასულ კვირას აშშ-ს 50 შტატისთვის გაგზავნილი ეს დოკუმენტი გამოცემა Wall Street Journal-ის მიერაა გამოქვეყნებული.
გამოცემა New York Times-ის თანახმად, ყველა შტატის და ასევე დიდი ქალაქების: ნიუ-იორკის, ჩიკაგოს, ფილადელფიის, ჰიუსტონის და სან ანტონიოსთვის გადაგზავნილ წერილებში აღწერილია სამი სცენარი ვაქცინა A და ვაქცინა B-ს გამოყენების. საქმე ეხება კომპანია Pfizer-ისა და კომპანია Moderna-ს ვაქცინებს. თითოეული მათგანის გამოყენებისას 2 დოზის გაკეთებაა საჭირო რამდენიმეკვირიანი ინტერვალით. შეერთებული შტატები პანდემიისგან ყველაზე დაზარალებული ქვეყანაა, სადაც კორონავირუსით 185 000 ადამიანი გარდაიცვალა. აშშ-მ ზემოთხსენებულ კომპანიებს მილიონობით ვაქცინა შეუკვეთა წინასწარ.
დოკუმენტში დეტალურადაა აღწერილი ვაქცინის შენახვისთვის აუცილებელი პირობები და მითითებულია მოსახლეობის ჯგუფები, ვისაც პირველ რიგში უნდა გაუკეთდეს ვაქცინა, მათ შორის სამედიცინო პერსონალს.
„ჩვენ გავიმარჯვებთ ვირუსზე, დავასრულებთ პანდემიას და გავხდებით იმაზე ძლიერები, ვიდრე ოდესმე ვყოფილვართ“, – განაცხადა დონალდ ტრამპმა ერთ-ერთ გამოსვლაში და მან დასძინა, რომ კორონავირუსის საწინააღმდეგო ვაქცინა მზად იქნება წლის ბოლომდეც და შესაძლოა მანამდეც. ტრამპის ეს განცხადება აშშ-ის საზოგადოების ნაწილმა პოლიტიკურ, პოპულისტურ განაცხადად მიიჩნია.
კვირას, Financial Times-სთან საუბრისას აშშ-ის სურსათისა და მედიკამენტების ზედამხედველობის სააგენტოს (FDA) დირექტორმა, სტივენ ჰანმა განაცხადა, რომ არ არის გამორიცხული, მომავალი ვაქცინა თავდაპირველად დაშვებული იყოს გადაუდებელი დახმარების სახით, მანამ, სანამ კლინიკური ცდები დასრულდება, რამაც უნდა დაადასტუროს მისი უსაფრთხოება და ეფექტურობა. მისი თქმით, ვაქცინის დაშვების ნებისმიერი საკითხი უნდა დამუშავდეს ვაქცინის მწარმოებლებთან. „თუ ვაქცინა დაიშვება ცდის მესამე ფაზის დასრულებამდე, ეს მიზანშეწონილად მიგვაჩნია. ამ ეტაპზე ვაქცინის დასაშვებად მიჩნევა მიზანშეწონილად რომ არ მიგვაჩნდეს, მაშინ სხვაგვარ გადაწყვეტილებას მივიღებდით“, – განაცხადა სტივენ ჰანმა.
მან უარყო გავრცელებული აზრი, რომ პრეზიდენტმა ტრამპმა მასზე გავლენა მოახდინა, რათა 3 ნოემბრის საპრეზიდენტო არჩევნებამდე დაშვებულიყო ვაქცინა. „ეს იქნება მეცნიერებაზე, მედიცინასა და მონაცემებზე დაფუძნებული და არა პოლიტიკური გადაწყვეტილება“, – განაცხადა აშშ-ის სურსათისა და მედიკამენტების ზედამხედველობის სააგენტოს (FDA) დირექტორმა.
