ჯანდაცვის მსოფლიო ორგანიზაციამ მოუწოდა სამხრეთ -აღმოსავლეთ აზიის სახელმწიფოებს, სასწრაფოდ გააძლიერონ აგრესიული ტესტირების ზომები COVID-19-ის წინააღმდეგ, რადგანაც დადასტურებული შემთხვევები 480-ს გადასცდა და ინფექციას შეეწირა 8 სიცოცხლე.
ფოტო: Piyush Goyal/twitter
სამხრეთ-აღმოსავლეთ აზიის რეგიონში ჯანმოს წევრი 11 ქვეყნიდან რვამ დაადასტურა COVID-19-ის შემთხვევები. ტაილანდს აქვს 177 დადასტურებული შემთხვევა, ინდონეზიას – 134, ინდოეთს – 125, შრი ლანკას – 19, მალდივებს – 13, ბანგლადეშს – 5, ნეპალსა და ბჰუტანს – თითო-თითო. ეს რიცხვები მზარდია.
„დასტურდება ვირუსის გადაცემის ახალი კლასტერები. რიცხვებს რომ შევხედოთ, ზოგიერთი ქვეყანა აშკარად მიიწევს COVID-19-ის შიდა გადაცემისკენ,“ – განაცხადა ჯანმოს რეგიონალურმა დირექტორმა და დასძინა, რომ ეს ტენდენცია უნდა აღიკვეთოს.
ფოტო: Piyush Goyal/twitter
„საზოგადოებრივი ჯანდაცვის მარტივ ღონისძიებებს ახლა კრიტიკული მნიშვნელობა აქვს. ხელის ჰიგიენის დაცვის, დაცემინებისას და დახველებისას პირზე ხელის აფარების და სოციალური დისტანციის დაცვის მნიშვნელობა შეუფასებელია. მხოლოდ ასე არის შესაძლებელი არსებითად შემცირდეს ინფექციის გადაცემა,“ – თქვა დოქტორმა კჰეტრაპალ სინგჰმა.
თუ შიდა გადაცემის შემთხვევები მოიმატებს, ქვეყნებს მოუწევთ გააძლიერონ და დააჩქარონ საპასუხო ქმედებები, ვირუსის გადაცემის ტემპის შესანელებლად და ეპიდემიის აღსაკვეთად.
ასეთ შემთხვევაში საჭირო გახდება საგანგებო მექანიზმების განსაკუთრებული გაძლიერება. პაციენტებით გადატვირთვის თავიდან ასაცილებლად, სამკურნალო დაწესებულებებისა და საავადმყოფოების ქსელებს მოუწევთ გააქტიურება.
თვითიზოლაცია იმ ადამიანების მხრიდან, ვისაც სუსტი სიმპტომები აქვთ, ყველაზე მნიშვნელოვან საზოგადოებრივ ქმედებად რჩება, რათა შემსუბუქდეს ჯანდაცვის სისტემაზე დაწოლილი ტვირთი და შემცირდეს ვირუსის გადაცემები.
ამის პარალელურად კვლავ აუცილებელი იქნება შემოწმდეს ყველა საეჭვო შემთხვევა, ასევე სიმპტომატური კონტაქტები შესაძლო ან დადასტურებული შემთხვევებისა.
