„…ქობულეთის მუნიციპალიტეტში ს.-ის სასაფლაოს მიმდებარე ტერიტორიაზე, ე.ბ.-მ ფიზიკური ძალადობა განახორციელა თავისი ოჯახის წევრის მიმართ. კერძოდ: არარეგისტრირებულ ქორწინებაში მყოფ მეუღლეს მ.ბ.-ს, რომელთანაც ეწეოდა ერთიან საოჯახო მეურნეობას, ხელი დაარტყა თავის არეში, რის შემდეგაც ხელები მოუჭირა ყელზე… დაზარალებულმა განიცადა ფიზიკური ტკივილი,“ – აღნიშნულია განაჩენში, რომლის მიხედვითაც ოჯახში ძალადობისთვის ქობულეთში მცხოვრებ კაცს 120 საათით საზოგადოებისთვის სასარგებლო შრომა შეუფარდეს.
ბრალდებულმა დანაშაულის ჩადენა აღიარა. მას სადავოდ არ გაუხდია პროკურატურის მიერ ამ საქმეზე შეგროვებული მტკიცებულებები მათ შორის, ვიზუალური დათვალიერების ოქმი, რომელიც პოლიციელებმა შემთხვევის ადგილზე შეადგინეს. ამ ოქმის მიხედვით, ქალის „კისრის წინა ნაწილში გამოხატულია სამი სხვადასხვა ზომისა და ფორმის მოწითალო ფერის ლაქები სისხლნაჟღენთების სახით“.
მოსამართლე თამარ ბეჟანიშვილმა ბრალდებული დამნაშავედ მიიჩნია და 150 საათით შეუფარდა საზოგადოებისთვის სასარგებლო შრომა, თუმცა იმის გათვალისწინებით, რომ ბრალდებული გირაოთი გათავისუფლებამდე პატიმრობაში იყო 7 დღე, მას სასჯელი 30 დღით შეუმცირდა.
