ბათუმის ხელოვნების სასწავლო უნივერსიტეტის რექტორი მაია ჭიჭილეიშვილი გახდა. მან ამ პოსტზე ერმილე მესხია შეცვალა, რომელსაც უფლებამოსილების ვადა ამოეწურა. ახალი რექტორი უნივერსიტეტის ექვსწევრიანმა აკადემიურმა საბჭომ სრული მხარდაჭერით აირჩია. მაია ჭიჭილეიშვილს პოსტზე კონკურენტი არ ჰყოლია.
“ჩემთვის ყველაზე მნიშვნელოვანი ამ ეტაპზე არის უნივერსიტეტი მოემზადოს ავტორიზაციისათვის. 2020 წლის პირველ იანვარს გადის ვადა. ახლა იწყება ავტორიზაციისთვის შეფასების ანგარიშის შევსება, ხარისხის განვითარების ეროვნულ ცენტრში გასაგზავნად. ასევე მნიშვნელოვანია, პროგრამების აკრედიტაცია. ხუთმა პროგრამამ გაიარა 2018 წელს აკრედიტაცია, დარჩენილია როგორც საბაკალავრო, ისე სამაგისტრო პროგრამები და აი, ამ პროგრამების საერთაშორისო სტანდარტთან შესაბამისობაში მოყვანა იქნება უპირველესი ამოცანა,” – ამბობს მაია ჭიჭილეიშვილი “ბათუმელებთან”.
ახალი რექტორის თქმით, ასევე მნიშვნელოვანია უნივერსიტეტი მოემზადოს ახალ შენობაში გადასასვლელად, რომელიც ექსპლუატაციაში წელს უნდა შევიდეს.
ბათუმის ხელოვნების სასწავლო უნივერსიტეტის ახალი შენობის მშენებლობა და რემონტი უკვე დასრულებულია. აჭარის ავტონომიური რესპუბლიკის მთავრობამ უნივერსიტეტისთვის 2017-2018 წლებში 3,5 მილიონი ლარი გამოყო. თუმცა შენობაში სასწავლო პროცესის დაწყება “ენერგო-პრო ჯორჯიაზეა” დამოკიდებული, რომელიც ამ ეტაპზე უნივერსიტეტისთვის საჭირო ელექტროენერგიის მიწოდებას ვერ ახერხებს.
ამავე თემაზე:
