თიბისი ჯგუფის ინფორმაციით, „გამოფენაზე დამთვალიერებელი ნახავს ფოტოგრაფის შემთხვევით გადარჩენილ ფოტოებს, რომლებიც 90-იანი წლების დასაწყისში, ფიზიკის ინსტიტუტის საწყობში იპოვეს“.
საწყობში ნაპოვნია იმ დროისთვის უცნობი ფოტოგრაფის – რეზო კეზელის 4 ათასამდე ნეგატივი, რომელიც წყალდიდობას გადაურჩა.
გამოფენის ინიციატორების ინფორმაციით, „რეზო კეზელი, რომელიც გასული საუკუნის 50-70-იან წლებში მოღვაწეობდა, საკუთარ ნამუშევრებში ეპოქას ეხმაურება, თუმცა რეალურად ეს არც საბჭოთა დროის პორტრეტია და არც საბჭოთა ადამიანის. ფოტოგრაფმა შეძლო, უარი ეთქვა არსებული კლიშეების გამოყენებაზე და საკუთარი ორიგინალური ფოტოგრაფიული ესთეტიკა შექმნა“.
რეზო კეზელის ნამუშევრები თბილისში გასული წლის ოქტომბერში, თბილისის ფოტო ფესტივალის ფარგლებში ნახა დამთვალიერებელმა.
გამოფენა – „კაცი აკორდეონით“„ოდესა-ბათუმის ფოტო დღეების“ დასკვნით ეტაპზე იმართება. რეზო კეზელის ნამუშევრების ნახვის მსურველებს თიბისი გალერეა 19:00 საათიდან მიიღებს შემდეგ მისამართზე – ბათუმი, ზუბალაშვილის 37, თიბისი გალერეა.
