„ნუ წარმოაჩენთ ამას ისე, რომ ჩვენ ტაშ-ფანდურისა და ცეკვის გარდა არაფერი გვაინტერესებს, ეს იყო საქველმოქმედო საღამო“, – თქვა აჭარის მთავრობის თავმჯდომარემ არჩილ ხაბაძემ და იქვე დასძინა, რომ ტერმინის – „საქველმოქმედო“ დამატება ჟურნალისტებს გამორჩათ სიუჯეტის მომზადების დროს: „თორემ მე ჩემს გამოსვლაში ვთქვი, რომ ეს იყო საქველმოქმედო საღამო, ტელეფონიც გამოვაცხადე და ბანერებიც გვქონდა. საღამოც წუთიერი დუმილით დაიწყო“.
იმის დასადასტურებლად, რომ გუშინ ნამდვილად საქველმოქმედო საღამოში მონაწილეობდა, არჩილ ხაბაძემ აჭარის ტელევიზიას საღამოს სრული ჩანაწერის ჩვენება სთხოვა. „რა თქმა უნდა, თუ ამის უფლება მაქვს“, – დასძინა ხაბაძემ.
აჭარის მთავრობის თავმჯდომარეს იქვე ჰკითხეს, ხომ არ იცის, რატომ ჩაიხსნა აჭარის ტელევიზიის ვებგვერდიდან ვარსკვლავის გახსნის საღამოს შესახებ მომზადებული სიუჟეტი, რაზედაც უპასუხა, რომ – არ იცის.
რატომ ვერ გადაიდო ღონისძიება, მაშინ როცა თბილისში სამი დღის წინ დიდი ტრაგედია დატრიალდა? – ამ კითხვის პასუხად არჩილ ხაბაძემ თქვა, რომ „სტუმრები იყვნენ უცხოეთიდან და თბილისიდანაც და ამიტომ“.
