ეკონომიკისა და მდგრადი განვითარების მინისტრის ბრძანებაში აღნიშნულია, რომ ქობულეთის შემოვლითი გზის განვითარების პროექტის განხორციელების მიზნით, აუცილებელია, პროექტის ზემოქმედების ქვეშ მოქცეული კერძო საკუთრებაში არსებული უძრავი ქონებების გამოსყიდვა:
„აღსანიშნავია, რომ ,,საავტომობილო გზების დეპარტამენტის მიერ უძრავი ქონების გამოსყიდვის შესახებ შეთანხმება მესაკუთრეებთან უმეტესად მიღწეულია (დაახლოებით – 90%), მაგრამ შეთანხმება ვერ იქნა მიღწეული ქობულეთის შემოვლითი გზის განვითარების პროექტით განსაზღვრული სამუშაოების ზოლში ქობულეთის მუნიციპალიტეტში, სოფელ ზედა აჭყვაში და სოფელ ხუცუბანში მდებარე 3 უძრავი ქონების თანამესაკუთრესთან, რომლებმაც, შესაბამის საკომპენსაციო თანხის მიღებაზე ,,საავტომობილო გზების დეპარტამენტს“ უარი განუცხადეს.
ეს უძრავი ქონებები განთავსებულია ქობულეთის შემოვლითი გზის განვითარების პროექტის მშენებლობის ტერიტორიაზე, შესაბამისად, მათზე საკუთრების უფლების მოპოვების გარეშე შეუძლებელია სამშენებლო სამუშაოების წარმოება“.
ექსპროპრიაციას ამჯერად დაექვემდებარა ეკატერინე კახიძის, ნანა ბაუჟაძის, მერი და სულეიმან სურმანიძეების თანასაკუთრებაში არსებული 2501 კვ/მ მიწის ნაკვეთი და მასზე განთავსებული შენობა-ნაგებობები; ასევე ბეგლარ, თემურ, თენგიზ და მაყვალა ქამაშიძეების თანასაკუთრებაში არსებული მიწის ორი ნაკვეთი – ჯამში 1736 კვ/მ ფართობის და მათზე განთავსებული შენობა-ნაგებობები.
2009 წლის 29 ოქტომბერს საქართველოსა და აზიის განვითარების ბანკს შორის გაფორმდა სასესხო ხელშეკრულება (სპეციალური ოპერაციები) – საგზაო დერეფნის საინვესტიციო პროგრამა – პროექტი I. სწორედ აღნიშნული სასესხო ხელშეკრულების ფარგლებში, ,,საავტომობილო გზების დეპარტამენტის“ მიერ ქობულეთის შემოვლითი გზის განვითარების პროექტისთვის დამუშავდა და აზიის განვითარების ბანკის (ADB) მიერ დამტკიცდა მიწის შესყიდვისა და განსახლების გეგმა (LARP III).
