ენერგო-პრო ჯორჯიამ მელიქიშვილზე ტროტუარი ამოყარა და აღარ შეაკეთა – მერიის პასუხი

მელიქიშვილის ქუჩის ტროტუარზე გავლა შეუძლებელია. მოსკოვის ქუჩიდან ლადო ასათიანის ქუჩამდე ტროტუარზე ფილების და მიწის გროვაა, დგას წყალიც. მოსახლეობის თქმით, ტროტუარზე მილები დაახლოებით სამი კვირის წინ ჩაყარეს, რის შემდეგ ტროტუარი ამოყრილი დატოვეს და აღარავინ გამოჩენილა.

მელიქიშვილის ქუჩაზე ამოყრილი ტროტუარის მიტოვებას ადასტურებენ ბათუმის მერიაში. მერიის ზედამხედველობის სამსახურში გვითხრეს, რომ ელექტროსადენების გასაყვანად ტროტუარი 23 ნოემბერს უნებართვოდ გათხარა „ენერგო-პრო ჯორჯიამ“.

„უნებართვოდ წარმოებული სამუშოების გამო, „ენერგო-პრო ჯორჯიას“ მიმართ შევადგინეთ ადმინისტრაციული სამართალდარღვევის ოქმი და გადავაგზავნეთ სასამართლოში. სასამართლოს ეს შემთხვევა ამ დრომდე არ განუხილავს,“ – გვითხრა ბათუმის მერიის ზედამხედველობის სამსახურის ადმინისტრაციის წარმომადგენელმა, ტარიელ გოგიტიძემ.

მერიის წარმომადგენლის განმარტებით, 24 ნოემბერს ადგილზე მივიდა ენერგოკომპანიის წარმომადგენელიც, რომელიც ტროტუარის თავდაპირველ მდგომარეობაში მოყვანას დაჰპირდა. „თუმცა, ამ დაპირების შემდეგ არაფერი შეცვლილა. ტროტუარი ისევ იგივე მდგომარეობაშია,“- დასძენს ტარიელ გოგიტიძე.

თუკი სასამართლო მერიის მიერ დადგენილ სამართალდარღვევას დაადასტურებს, ენერგოკომპანია 1000 ლარით დაჯარიმდება. დაჯარიმებიდან 10 დღეში კი, თუკი ტროტუარს არ მოაწესრიგებენ, მერიას ენერგოკომპანიის 3 ათასი ლარით დაჯარიმების უფლება ექნება.

„ენერგო-პრო ჯორჯიას“ ცხელ ხაზზე გვითხრეს, რომ მელიქიშვილის ქუჩაზე მაღალი ძაბვის სადენები გაიყვანეს და ეს შეთანხმებული იყო ბათუმის მერიასთან. კომპანიის განმარტებით, სადენების გაყვანა ამ დრომდე გაგრძელდა, მომდევნო სამ დღეში კი, კომპანია ტროტუარს აღადგენს და თავდაპირველ მდგომარეობაში მოიყვანს.

რატომ ითხოვს მერია კომპანიის დაჯარიმებას, თუკი მერიასთან სამუშაოები შეთანხმებული იყო? – „ენერგო-პრო ჯორჯიას“ ცხელი ხაზის ოპერატორმა გვიპასუხა, რომ ამ ინფორმაციას ვერ მოგვაწოდებდა. მან რომელიმე პასუხისმგებელ პირთან დაკავშირებაზე უარი გვითხრა.

ტროტუარი მელიქიშვილის ქუჩაზე / 06.12.2017