სახალხო დღესასწაული „შემოდგომა ქედაში -2018“ 30 სექტემბერს გაიმართება [ანონსი]

სახალხო დღესასწაული – „შემოდგომა ქედაში“ 2018 წლის 30 სექტემბერს 11 საათზე დაიწყება. ღონისძიებას ადგილობრივ მოსახლეობასთან ერთად დაესწრებიან მოწვეული სტუმრები, ტურისტები, აჭარის არ მთავრობისა და საზოგადოების სხვა წევრები.

მრავალფეროვანი პროგრამა გაიხსნება უკრაინის ქალაქ კრემენეცთან დამეგობრების მემორანდუმის გაფორმებით (მახუნცეთი, თამარის ხიდის მიმდებარე ტერიტორია).

ღონისძიების ერთგვარი სიახლეებია: ევროპის წელთან დაკავშირებით მოწყობილი აგრობაზრობის გამოფენა-გაყიდვა, „სთრით არტი“, ქედელი გმირის ინსცენირება ფილმიდან „მევლუდი“, უკრაინის დელეგაციის ვიზიტი და ანსამბლი „ლიუბისტოკი“ , პეტიციის საფუძველზე ქედის ცენტრალური პარკისთვის რუსთაველის პრემიის ლაურეატის, პოეტ ფრიდონ ხალვაშის სახელის მინიჭება, ზაზა ხალვაშის ფილმის „ნამეს“ წარმატებების აღნიშვნა და ა.შ.

დაგეგმილია ასევე, სპორტული აქტივობები, საბავშვო გასართობი პროგრამები, აჭარული კერძების მომზადების ინსცენირება, სამუზეუმო ექსპონანტების, კულინარიული, ფოლკლორული, ეთნოგრაფიული და რეწვის ნიმუშების გამოფენები. გაიმართება საპატიო ქედელების და დამსახურებული მოღვაწეების დაჯილდოების ცერემონია.

ღონისძიებას დახურავს გალაკონცერტი, რომელიც ორ – ფოლკლორულ და საესტრადო – ნაწილად გაიმართება.

ღონისძიებას დაასრულებს რთველისა და ღვინის დაწურვის ცერემონია.

სახალხო დღესასწაულის ღონისძიების ორგანიზატორია ქედის მუნიციპალიტეტის მერია. თანაორგანიზატორები არიან: არასამთავრობო ორგანიზაციები – „სენი“ „დემოკრატიის ინსტიტუტი“ და ქედის ღვინის საწარმო KTW-ი.

ღონისძიების ბიუჯეტი 14 298 ლარია.

იხილეთ სრული პროგრამა

ნეტგაზეთის მასალების სხვა გამოცემებში გადაბეჭდვის წესი


ავტორი