Batumelebi | „დაპატიმრებული მზერა“ – ესპანელი ფოტოგრაფის გამოფენა ბათუმში „დაპატიმრებული მზერა“ – ესპანელი ფოტოგრაფის გამოფენა ბათუმში – Batumelebi
RU | GE  

„დაპატიმრებული მზერა“ – ესპანელი ფოტოგრაფის გამოფენა ბათუმში

 

1 ნოემბერს ბათუმის თანამედროვე ხელოვნების სივრცე  კატალონიელი ფოტოგრაფის მანელ ესკლუსას ფოტოგამოფენას უმასპინძლებს.

 

სერია „დაპატიმრებული მზერა“ – „Els Ulls Aturats“  ესპანელი ფოტოგრაფის პროექტია,  რომელზედაც იგი 1973-1979 წლებში მუშაობდა. პროექტი მზერის სიმბოლიკაზეა აგებული, რომელიც მის იმ დროინდელ სულიერ და ფიზიკურ მდგობარეობას ასახავს. ფოტოსერია ავტორის ბრძოლის პროცესს წარმოადგენს, სადაც იგი უპირისპირდება ავადმყოფობას, სიკვდილის შიშს და არარსებულ მომავალს.

 

პროექტის კურატორი  თათა ათანელია, თანაკურატორი კი ხიმენა ფლორესი.

 

მანელ ესკლუსა 1952 წელს დაიბადა ბიკში (კატალონია). ფოტოგრაფიით რვა წლის ასაკში, მამამისის ფოტოსტუდიაში ყოფნისას დაინტერესდა. 1966-დან 1977 წლამდე, მასთან ერთად მუშაობდა სარეკლამო ფოტოგრაფიაში. ის ბიკის ინდუსტრიის მაგისტრების სკოლაში სწავლობდა. მისი პირველი გამოფენა 1973 წელს, Sala Aixela-ში გაიმართა. ერთი წლის შემდეგ, Dotacion de Arte Castellblanch-ისგან ფოტოგრაფიაში გრანტი მოიპოვა და სტაჟირებაზე არლში გაემგზავრა, სადაც მას ანსელ ადამსი, ნილ უაითი, ართურ თრისი, იან დიოზაიდი, დენის ბრაიტი და ლუსიენ კლერჟი ასწავლიდნენ. 1975 წლიდან ასწავლიდა სხვადასხვა ცენტრში, სადაც სწავლებას თავის შემოქმედებით მუშაობას უთავსებდა. ესკლუსა თანამედროვე ესპანურ ფოტოგრაფიაში ერთ-ერთი ყველაზე მასშტაბური ფიგურაა. 1970-იან წლებში გადაღებული მისი პირველი სერიები /Git, Ahucs, Crisalides, Els Ulls Aturats…/ საკუთარი ფოტოენის პოვნის გზად იქცა და 1980-იან წლებში შექმნილი სერიებით დაგვირგვინდა, რამაც მას შემოქმედის სახელი მოუპოვა.

 

 

ნეტგაზეთის მასალების სხვა გამოცემებში გადაბეჭდვის წესი
"ბათუმელები"