Batumelebi | მთავრობის არაკოორდინირებული მუშაობა საბოტაჟის ეჭვს აჩენს მთავრობის არაკოორდინირებული მუშაობა საბოტაჟის ეჭვს აჩენს – Batumelebi
RU | GE  

მთავრობის არაკოორდინირებული მუშაობა საბოტაჟის ეჭვს აჩენს

 

ახალგაზრდა ფინანსისტთა და ბიზნესმენთა ასოციაცია“ მთავრობის არაკოორდინირებულ მუშაობაზე აკეთებს აქცენტს და აცხადებს, რომ ხელისუფლების შეუთანხმებელი მუშაობა საბოტაჟის ეჭვს აჩენს, რაც ქვეყანაში ინვესტიციების შემოდინებას აფერხებს. ასოციაციაში თვლიან, რომ სახელმწიფო სტრუქტურების არაკოორდინირებული მუშაობის ერთ-ერთი ნათელი მაგალითია ჯვარი–ხორგას ელექტროგადამცემი ხაზის მშენებლობის გარშემო შექმნილი მდგომარეობა.

 

 პროექტი გაჩერებულია, ხოლო მის მშენებლობაზე პასუხისმგებელი უწყებები აცხადებენ, რომ ყველაფერი გეგმის მიხედვით მიმდინარეობს. დღეს აღმოსავლეთ და დასავლეთ საქართველოს ერთმანეთთან მხოლოდ ერთი, 500კვ-იანი მაღალი ძაბვის ელექტროგადამცემი ხაზი აკავშირებს. ამ ხაზის ნებისმიერი გაუმართაობა, განსაკუთრებით შემოდგომისა და ზამთრის პერიოდში, იწვევს ელექტროენეგრიის მწვავე დეფიციტს. შექმნილი მდგომარეობიდან გამომდინარე ჯვარი–ხორგას 500 კვ–იანი ელექტროგადამცემი ხაზის მშენებლობა 2012 წელს გადაწყდა.

პროექტს მთავრობის თხოვნით ახორციელებს „ევროპის რეკონსტრუქციისა და განვითარების ბანკი“ (EBRD), „ევროპის საინვესტიციო ბანკი“ (EIB), „გერმანიის რეკონსტრუქციის საკრედიტო ბანკი“ (KFW) და „ევროპის სამეზობლო საინვესტიციო ფონდი“ (ECNIF). პროექტის მთლიანი ღირებულება 270 მილიონ ევროს შეადგენს. „ჩვენი მიზანია, რომ საქართველო დაბრუნდეს საინვესტიციო სფეროში, მოხვდეს ინვესტორთა რადარებზე“ – განაცხადა „ევროპის რეკონსტრუქციისა და განვითარების ბანკის“ მმართველმა დირექტორმა ოლივიე დეკამმა საქართველოს პრემიერ-მინისტრ ირაკლი ღარიბაშვილთან შეხვედრის შემდეგ. ეს ნიშნავს, რომ საქართველოს საერთაშორისო საფინანსო ინსტიტუტების მხარდაჭერის შანსი აქვს. სამწუხაროა, რომ სახელმწიფო სტრუქტურების შეუთანხმებელი მუშაობის შედეგად ჭიანურდება ქვეყანაში 270 მილიონი ევროს პირდაპირი უცხოური ინვესტიციის შემოდინება. და მეორე – საქართველოს მოსახლეობას კვლავ ექნება ელექტროენერგიის მიწოდების პრობლემა – აღნიშნულია ასოციაციის მიერ ბათუმელებისადმი მოწოდებულ ინფორმაციაში. ასოციაციაში აცხადებენ, რომ არ შეიძლება კონკრეტული პროექტების განხილვა სამთავრობო კულუარებში ერთი, ორი და მეტი წლით გაიწელოს. მითუმეტეს, როდესაც პროექტის ინიციატორი თავად მთავრობაა და შექმნილი მდგომარეობა ამ ელექტროგადამცემი ხაზის აშენების აუცილებლობაზე მიუთითებს.

ნეტგაზეთის მასალების სხვა გამოცემებში გადაბეჭდვის წესი
"ბათუმელები"