გამარტივებული ელექტრონული ტენდერის ღირებულება 20 250 ლარია და ითვალისწინებს 15 დღის განმავლობაში „შუქურას“ 30 კაციან შემადგენლობის სასტუმროში დაბინავებას სამჯერადი კვებით.
სასტუმრო ქობულეთის ცენტრალურ სტადიონთან არაუმეტეს 500 მეტრის დაშორებით უნდა იმყოფებოდეს.
„შუქურას“ დირექტორის რევაზ ჩელებაძის თქმით, გუნდის დაკომპლექტება განახლდა, რომელშიც ადგილობრივი მოთამაშეების გარდა შედიან მოთამაშეები ქუთაისიდან, ზუგდიდიდან, თბილისიდან, ასევე რუსეთიდან. მათ კი წვრთნებისთვის შეკრებები სჭირდებათ.
„ჩვენ არ გაგვაჩნია ბაზა, სადაც შეკრებაზე ფეხბურთელები იცხოვრებენ. ამიტომ მათი მომზადებისთვის, დაბინევებისთვის, კვების მომსახურებაზე ვაცხადებთ ტენდერს“ – ამბობს რევაზ ჩელებაძე.
რევაზ ჩელებაძის ინფორმაციით, 2015 წლის ბოლოს ქობულეთის ცენტრალურ სტადიონზე ფეხბურთელებისთვის ორსართულიანი საცხოვრებელი კომპლექსის აშენება იგეგმება. ასევე „შუქურას“ მალე ინტერნეტ სივრცეში საკუთარი პორტალი ექნება, რომელზეც ამჟამად მიმდინარეობს მუშაობა.
ქობულეთის შუქურა 2013-2014 წლის სეზონში პირველი ლიგის A ჯგუფის ჩემპიონი გახდა. განახლებული „შუქურა“ შეკრებების პირველ ეტაპს 20 ივნისს დაიწყებს და ფეხბურთელებს ორი კვირის განმავლობაში ვარჯიშები ჩაუტარდებათ.
