ნეტგაზეთი • RU

16 უფასო კლუბი ახალგაზრდა ფეხბურთელებისთვის

 

 

ბათუმის უბნებში 13 წლამდე ასაკის ბავშვებისთვის 16 უფასო კლუბი გაიხსნა. ახალგაზრდული უფასო კლუბები ბათუმის „დინამოს“ პროექტია, რომლის პრეზენტაცია „დინამომ“ დღეს, „დემოკრატიული ჩართულობის ცენტრში“ გამართა და კლუბებს ბურთები, სავარჯიშო მაისურები და სხვა სპორტული ინვენტარი გადასცა.

 

 

 

პროექტის განხორციელებისთვის „დინამოს“ ბიუჯეტიდან 54 ათასი ლარი დაიხარჯა. ბათუმის „დინამოს“ დირექტორის ოთარ ფედიჩკინის განმარტებით, თითოეულ კლუბს თავისი მწვრთნელი ჰყავს. პროექტის კოორდინატორი კი ვალერი მაჩხელიანია. „ჩვენ ვართ პირველები საქართველოში, ვინც  ბავშვთა უფასო ფეხბურთის პროექტი დაიწყო. ერთი თვის განმავლობაში ჩვენ დაახლოებით 500 ბავშვი მოვიზიდეთ და ბათუმში ფეხბურთი მასობრივი გავხადეთ. დარწმუნებული ვარ, ამ პროექტის მეშვეობით რამდენიმე ნიჭიერი ფეხბურთელი აღიზრდება“- ამბობს ოთარ ფედიჩკინი.

 

„დინამო“ უფასო კლუბების იდეას ბათუმის მერიის ფინანსური მხარდაჭერით ახორციელებს. როგორც ოთარმა აღნიშნა, უფასო კლუბების ინიციატორი ქალაქის საკრებულოს თავმჯდომარე ირაკლი ჩავლეიშვილი იყო. „ბათუმის ბიუჯეტიდან დინამოსთვის გამოყოფილია  თანხა, დაახლოებით მილიონ-ნახევარი ლარი, უფასო კლუბები სწორედ ამ თანხიდან დაფინანსდებიან, ამ თანხიდან გამოიყოფა 16 მწვრთნელისა და კლუბების მთავარი კოორდინატორის ანაზღაურებაც. პროექტი არ არის ერთჯერადი და ის მუდმივად გაგრძელდება. სამომავლოდ, რამდენი ახალი უბანი და სპორტული მოედანიც შეიქმნება ბათუმში, იმდენი ახალი კლუბი დაემატება“- ამბობს ირაკლი ჩავლეიშვილი.

 

ნეტგაზეთის მასალების სხვა გამოცემებში გადაბეჭდვის წესი
ნინო ხიმშიაშვილი