„გამოვხატავთ ღრმა იმედგაცრუებას“- ასე ეხმიანება სტუდენტური მოძრაობა „თავისუფლებისთვის“, ცალკეული ოპოზიციური პარტიების გადაწყვეტილებას, 4 ოქტომბრის არჩევნებში მონაწილეობაზე.
„გასულ არჩევნებზე ჩვენი სტუდენტური მოძრაობა მკაფიოდ, კამპანიურად და თანაბრად უჭერდა მხარს ოთხივე მსხვილ, ბარიერგადალახულ ოპოზიციურ კოალიციას. ამ მიზნით არჩევნებამდე 2 თვის განმავლობაში ჩავატარეთ უწყვეტი კამპანია, ფეხდაფეხ შემოვიარეთ ყველა რეგიონი და ვეცადეთ დაგვერწმუნებინა ჩვენი თანამოქალაქეები, არჩევანი სწორედ მათ სასარგებლოდ გაეკეთებინათ.
ამავე მიზნით, 26 ოქტომბერს ჩვენი წევრების უმრავლესობა გადანაწილებული იყო ქვეყნის მასშტაბით სხვადასხვა უბანზე, კომისიის წევრებისა და დამკვირვებლების სტატუსით, რათა ყველაფერი გაგვეკეთებინა ქართველი ხალხის არჩევანის დასაცავად და მის გასაფორმებლად.
ივანიშვილის რეჟიმმა გადაწყვიტა ქართველი ამომრჩევლის ნება ხისტად უგულებელეყო და არჩევნები ფაქტობრივად გაუქმებულად გამოაცხადა.
ამ მიზეზით მხარს ვუჭერდით ოპოზიციის ერთიან სტრატეგიას, რეჟიმთან სრული ართანამშრომლობისა და მკვეთრი საპროტესტო/წინააღმდეგობის მოძრაობის საშუალებით, პრინციპული და თანმიმდევრული ბრძოლით, ერთად გაგვევლო გზა დიქტატორული რეჟიმის დასრულებამდე.
ჩვენთვის თავიდანვე გაუგებარი იყო ჩვენი თანამებრძოლი და ჩვენ მიერ მხარდაჭერილი პოლიტიკური პარტიების ნაწილის, „ლელო – ძლიერი საქართველოსა” და “გახარია საქართველოსთვის” მხრიდან ივანიშვილის ფარსში ასპარეზობაზე საუბარი. მონაწილეობას ვიღებდით ყველა სადისკუსიო ფორმატში და მათ შორის პირადი კომუნიკაციის გზითაც ვცდილობდით მათ გადარწმუნებას, მათგან ადეკვატურობის, თანმიმდევრულობისა და პრინციპულობის ჩარჩოებში დაბრუნების იმედით.
ბოლო მომენტამდე გვჯეროდა, რომ ჩვენი საერთო ბრძოლის გაგრძელება ჯერ კიდევ შესაძლებელი იყო და რომ არ გადადგამდნენ იმგვარ ნაბიჯს, რომელიც საბოლოოდ მოკლავდა ერთიანი და კიდევ უფრო მკვეთრი ბრძოლით ივანიშვილის ანტიდემოკრატიულ რეჟიმთან დაპირისპირების პოტენციალს. დღევანდელი განცხადებით ეს იმედი საბოლოოდ გაქრა.
ამის გამო გვიწევს მკაფიოდ განვაცხადოთ:
სრულად ვემიჯნებით ზემოთ ხსენებული ორი ოპოზიციური პარტიის კოლაბორაციონისტურ სტრატეგიას და რეჟიმის სისტემურ ოპოზიციად ჩამოყალიბების გზას. კატეგორიულად გაუმართლებლად მიგვაჩნია ქვეყნისთვის ამ კრიტიკულ მომენტში საკუთარი ვიწრო პარტიული ინტერესებით მოქმედება. ამის გამო, დღეიდან ვწყვეტთ მათთან თანამშრომლობას.
ჩვენ ერთგული ვართ საკუთარი პრინციპების და ვერასდროს ავხსნით, როგორ არის შესაძლებელი იმ პროცესში მონაწილეობა, რომელიც რეალურად არ არსებობს – ივანიშვილმა არჩევნები, როგორც ხელისუფლების დემოკრატიული ცვლილების მთავარი ინსტრუმენტი, საბოლოოდ მოკლა.
მკაფიოდ გვჯეროდა და დღესაც გვწამს, რომ ქვეყანაში დამყარებული ანტიდემოკრატიული, ანტიქართული და ანტიადამიანური რეჟიმის დამარცხების გზა მხოლოდ თანმიმდევრულ და პრინციპულ ბრძოლაზე გადის, რომელიც თავისთავად გამორიცხავს ივანიშვილის რაიმე სახის ცირკში მონაწილეობასა და მისი “დემოკრატიულობის” ფასადის შესანარჩუნებლად ანტურაჟის როლის შესრულებას.
მყარად ვრჩებით ბრძოლაში იმ ადამიანებთან ერთად, რომლებმაც ერთგულება გამოავლინეს ჩვენი საერთო ღირებულებების მიმართ და ვემზადებით გადამწყვეტი წინააღმდეგობის გასაწევად ივანიშვილის დიქტატურის დასასრულებლად“-ნათქვამია სტუდენტური მოძრაობის განცხადებაში, რომელიც დღეს, 6 ივლისს გამოქვეყნდა ფეისბუქზე.
