29 მაისს, რუსეთის ქალაქ სტავროპოლში, საცხოვრებელ კორპუსთან აფეთქების შედეგად დაიღუპა ქალაქის მერის მოადგილე ზაურ გურციევი, რომელიც ხელმძღვანელობდა უკრაინის ქალაქ მარიუპოლის აღების ოპერაციის საჰაერო ნაწილს.
ინფორმაციას ამის შესახებ რუსული და უკრაინული მედია ავრცელებს.
სტავროპოლის მხარის გუბერნატორის თქმით, განიხილება „უკრაინული კვალის“ ვერსია.
გავრცელებული ცნობებით, გურციევი ქალაქ მარიუპოლის აღების ოპერაციის საჰაერო ნაწილში მონაწილეობდა.
კერძოდ, რუსული მედიის ინფორმაციით, ზაურ გურციევი ხელმძღვანელობდა რუსეთის საჰაერო ძალებისა და საჰაერო თავდაცვის საბრძოლო კონტროლის ცენტრს, რომელიც პასუხისმგებელია საჰაერო ძალებისა და სახმელეთო ჯარების ურთიერთქმედებაზე.