11-12 მარტს ბათუმის საქალაქო სასამართლოში მოსამართლეებმა: ალექსანდრე გოგუაძემ, ჯუმბერ ბეჟანიძემ და მარიანა ფომაევამ ჯამში 23 პირი, აქციის მონაწილეები, დააჯარიმეს 5-5 ათასი ლარით ზებრა გადასასვლელზე მსვლელობის გამო.
საუბარია ბათუმში 31 იანვრის აქციაზე – იმ დღეს პოლიციელებმა აქციის მონაწილეებს უთხრეს, რომ „საკმარისი რაოდენობით“ არ არიან და ქუჩის სავალი ნაწილო უნდა გაათავისუფლონ.
აქციის მონაწილეებმა პროტესტის ნიშნად ზებრაზე მოძრაობა დაიწყეს, რაც, ახალგაზრდა იურისტთა ასოციაციის შეფასებით, სრულად ჯდება გამოხატვის თავისუფლების ფარგლებში.
შს სამინისტრო კი ირწმუნება, რომ 31 იანვარს, ღამით, გამსახურდიასა და აბაშიძის ქუჩების კვეთაში, სადაც აქცია მიმდინარეობდა, მოძრაობა შეფერხდა.
აქცია საკონსტიტუციო სასამართლოსთან საღამოს 7 საათის შემდეგ დაიწყო, როცა სასამართლო აღარ მუშაობდა. აბაშიძისა და გამსახურდიას ქუჩების კვეთაზე, სადაც აქციის მონაწილეები ზებრაზე გადაადგილდებოდნენ, საღამოს საათებში დატვირთული არ არის – აქ, მახლობლად, ადმინისტრაციული შენობები მდებარეობს, საკონსტიტუციო სასამართლო და აჭარის მთავრობა, ორივე უწყების სამუშაო საათები აქციის დროს დასრულებული იყო და აქციის მონაწილეების გადაადგილება მათ მუშაობას ხელს ვერ შეუშლიდა.
აქციის მონაწილეებს ადმინისტრაციული კოდექსის 174-ე მუხლის მეოთხე ნაწილით ედავებოდნენ – „სასამართლოს შესასვლელის ბლოკირება, შეკრების ან მანიფესტაციის მოსამართლის საცხოვრებელ ადგილას ან საქართველოს საერთო სასამართლოში ჩატარება – გამოიწვევს დაჯარიმებას 5 000 ლარის ოდენობით ან ადმინისტრაციულ პატიმრობას 60 დღემდე ვადით“.
_________________
ფოტოზე: 31 იანვრის აქცია ბათუმში, მოქალაქეები ზებრა გადასასვლელზე. ფოტო: ედო მჟავანაძე
