„გამოდით! გამოდით!“ – ბათუმში საპროტესტო აქციის მონაწილეები მსვლელობას მართავენ

ბათუმში დღეს, 29 ნოემბერს, საღამოს, დაიწყო აქცია, რომლის მონაწილეებიც აპროტესტებენ „ოცნების“ გადაწყვეტილებას ევროკავშირში გაწევრიანების შეჩერების შესახებ. აქციის მონაწილეები ევროპის მოედანზე შეიკრიბნენ და მსვლელობით მიემართებიან ქალაქის შემოსასვლელთან.

„გამოდით! გამოდით“ – სკანდირებენ აქციის მონაწილეები და მოქალაქეებს მოუწოდებენ, შეუერთდნენ აქციას. აქციის მონაწილეები გეგმავენ ქალაქის შემოსასვლელი გზის გადაკეტვას.

„ბათუმი არის ყველაზე ევროპული ქალაქი!“ – ისმის აქციაზე.

აქციას უერთდებიან სტუდენტები, ლექტორები, მასწავლებლები, პოლიტიკოსები სხვადასხვა პოლიტიკური გუნდიდან, სამოქალაქო აქტივისტები, არასამთავრობო ორგანიზაციების წარმომადგენლები და ა.შ.

ბათუმის გარდა მეორე დღეა საპროტესტო აქციებია თბილისსა და ქუთაისში. 

• რა ხდება?

ქვეყანაში მასობრივი საპროტესტო გამოსვლები მოჰყვა „ქართული ოცნების“ პრემიერ-მინისტრის, ირაკლი კობახიძის განცხადებას, როცა მან თქვა, რომ 2028 წლამდე ევროკავშირში გაწევრიანებაზე მოლაპარაკებების გახსნას დღის წესრიგში არ დააყენებენ.

გუშინ საქართველოს 5 ქალაქში პროტესტი მოჰყვა ამ განცხადებას.

თბილისში ათასობით მოქალაქე გამოვიდა რუსთაველზე ანტიკონსტიტუციური ხელისუფლების გადადგომის მოთხოვნით.

სამოქალაქო აქცია თბილისში სპეცრაზმმა დაარბია. სასტიკად გაუსწორდნენ დემონსტრანტებს, დააკავეს 43 ადამიანი, სცემეს და დააზიანეს 20-ზე მეტი ჟურნალისტი.

საპროტესტო აქციები დღესაც გაიმართება თბილისში. მოქალაქეები კონსტიტუციიდან გასული „ოცნების“ ხელისუფლების გადადგომას და ახალ არჩევნებს მოითხოვენ.