Batumelebi | განრიდება, შინაპატიმრობა, შემცირებული სასჯელის ვადები -ცვლილებები კოდექსში განრიდება, შინაპატიმრობა, შემცირებული სასჯელის ვადები -ცვლილებები კოდექსში – Batumelebi
RU | GE  

განრიდება, შინაპატიმრობა, შემცირებული სასჯელის ვადები -ცვლილებები კოდექსში

 

 

14-დან 18 წლამდე ასაკის მოზარდებისათვის სპეციალიზებული  კოდექსი მთავრობამ უკვე დაამტკიცა. როგორც იუსტიციის მინისტრმა დღეს გამართულ ბრიფინგზე განმარტა, კოდექსის მთავარი სიახლე 18 წლამდე ასაკის პირებისათვის მართლმსაჯულების სპეციალიზებული ინსტიტუტის შექმნაა. ამ კოდექსის ამოქმედების შემდეგ საქართველოში იქნებიან სპეციალიზებული პოლიციელები, გამომძიებლები, პროკურორები და მოსამართლეები, რომლებიც ბავშვების საქმეებს გამოიძიებენ და განიხილავენ.  აგრეთვე იურიდიული დახმარების ბიუროში შეიქმნება მუდმივმოქმედი ჯგუფი ადვოკატებისა,  რომლებიც ბავშვთა საქმეებზე იმუშავებენ. 

„ვინც ჩაიდენს დანაშაულს, სახელმწიფომ უნდა იზრუნოს იმაზე, რომ რეციდივისტად არ ჩამოყალიბდეს ის, ბავშვის საუკეთესო ინტერესი იქნება წამყვანი ამ პროცესში,  დღეს მთავრობამ დაამტკიცა  სამართლებრივი  და პოლიტიკური მნიშვნელობის დოკუმენტი“-განაცხადა თეა წულუკიანმა  არასრულწლოვანთა მართლმსაჯულების კოდექსზე საუბრისას.  

   სისხლის სამართლის დევნასთან მიმართებაში  არასრუწლოვნებთან უპირატესობა ენიჭება   მედიაციისა და განრიდების ინსტიტუტებს. ახალი კოდექსის კანონპროექტის მიხედვით, ბრალის წარდგენიდან წინასასამართლო სხდომამდე მოზარდისთვის პატიმრობის  ვადა 60-დან 40 დღემდე,  ხოლო  პატიმრობაში მყოფი არასრულწლოვნისათვის ბრალდებულად ყოფნის ვადა 9-დან 6 თვემდე მცირდება, იკრძალება არასრულწლოვნისთვის უვადო პატიმრობა.

წულუკიანმა ასევე განმარტა, რომ განიხილავენ არასრულწლოვნების შემთხვევაში შინაპატიმრობას, როგორც სასჯელის ზომას, თუმცა ჯერ სახელმწიფომ ამისთვის საჭირო  სპეციალური სამაჯურები უნდა შეიძინოს. მინისტრის განმარტებით, შინაპატიმრობის ხარჯზე სახელმწიფო დიდ ეკონომიას გააკეთებს, რადგან პენიტენციალურ სისტემაში პატიმრის შენახვა სახელმწიფოს უფრო ძვირი უჯდება, ვიდრე შინაპატიმრობის ინსტიტუტის ამოქმედება.

ნეტგაზეთის მასალების სხვა გამოცემებში გადაბეჭდვის წესი
ნათია როყვა