„ქართული ოცნების“ ბათუმის შტაბის ხელმძღვანელმა, ირაკლი ჭეიშვილმა, ბრიფინგზე განაცხადა, რომ ბათუმში, 24-ე უბანზე „თავისუფალი ზონის“ წარმომადგენელი ვახტანგ კიწმარიშვილი „ნაციონალური მოძრაობის“ აგიტაციას ეწეოდა საარჩევნო უბნის შიგნით. მისივე თქმით, ამავე უბანზე დამკვირვებელია ვახტანგის შვილი, გურამ კიწმარიშვილიც. მისი თქმით, აღნიშნულზე დაიწერა საჩივარი და შედგა შესაბამისი ოქმი, მაგრამ გააძევეს თუ არა მამა-შვილი უბნიდან, ,,ქართულ ოცნებას” ჯერ ინფორმაცია არ აქვს.
„მივიჩნევთ, რომ ეს იყო გადაცდომა და მამა-შვილმა უბანი უნდა დატოვოს, თუმცა საბოლოო გადაწყვეტილების მიღება შესაბამის ოლქზეა დამოკიდებული” – აცხადებს ირაკლი ჭეიშვილი.
მისივე ინფორმაციით, ბათუმის 26-ე უბანზე „ნაციონალური მოძრაობის“ წარმომადგენლის მიერ ამომრჩევლისთვის თანხის გადაცემის ფაქტიც დაფიქსირდა საარჩევნო უბნის გარეთ და როგორც კი შესაბამისი მტკიცებულებები ექნებათ, „ქართული ოცნება“ დოკუმენტურად შეეცდება ფაქტის დადასტურებას.
ირაკლი ჭეიშვილს ასევე ჰკითხეს საარჩევნო უბნებთან ამომრჩევლების მასიურად მიყვანის შესახებ, რაზეც მან განაცხადა, რომ როცა საქმე ეხება პირადი მანქანით მეგობრების და ახლობლების საარჩევნო უბნამდე მიყვანას, ამაში პრობლემას ვერ ხედავს. იგი ამბობს, რომ საარჩევნო შტაბიდან ამომრჩეველთა ორგანიზებულ გადაყვანას ადგილი არ ჰქონია.
