Batumelebi | რექტორობის კანდიდატი: მეუფე სპირიდონის ლოცვა-კურთხევით საპატრიარქოს უნივერსიტეტში ვმოღვაწეობ რექტორობის კანდიდატი: მეუფე სპირიდონის ლოცვა-კურთხევით საპატრიარქოს უნივერსიტეტში ვმოღვაწეობ – Batumelebi
RU | GE  

რექტორობის კანდიდატი: მეუფე სპირიდონის ლოცვა-კურთხევით საპატრიარქოს უნივერსიტეტში ვმოღვაწეობ

 

დღეს, 9 მარტს, ბათუმის შოთა რუსთაველის უნივერსიტეტში რექტორობის კანდიდატებთან სტუდენტების შეხვედრაზე ერთ-ერთმა კანდიდატმა, ბესიკ ბერიძემ განაცხადა, რომ 2009 წელს უნივერსიტეტიდან იგი პოლიტიკური ნიშნით დაითხოვეს და მისი უნივერსიტეტში დაბრუნება, გარკვეულწილად, სამართლიანობის აღდგენის პროცესის დასაწყისი იქნება. ბესიკ ბერიძე ამჟამად წმინდა ტბელ აბუსერისძის სახელობის სასწავლო უნივერსიტეტის სრული პროფესორია. 

 

„ამ უნივერსიტეტში მე ვიღვაწე ზუსტად 33 წელი, 1976 წელს გავხდი სტუდენტი, 1981 წელს უკვე ვიყავი უნვერსიტეტის ახალგაზრდული ორგანიზაციის ხელმძღვანელი და წლების განმავლობაში გავიარე გზა ასისტენტიდან პროფესორის აკადემიური თანამდებობის ჩათვლით, მაგრამ მოხდა ისე, რომ 2009 წლის კონკურსში მე დავტოვე უნივერსიტეტი წმინდა აპოლიტიკური ნიშნით. მე ვიყავი ეროვნული ფორუმის აჭარის ოგანიზაციის ხელმძღვანელი და ლიდერი, ეს იყო იმის მიზეზი, რომ უნივერსიტეტი დამატოვებინეს.

 

ექვსი თვე ვიყავი უმუშევარი და მერე სხალთის მთავარეპისკოპოსის, მეუფე სპირიდონის ლოცვა-კურთხევით უკვე მეხუთე წელია რაც ვმოღვაწეობ საქართველოს საპატრიარქოს წმ. ტბელ აბუსერისძის უნივერსიტეტში სრულ პროფესორად. ეს შესავალი იმიტომ დამჭირდა, რომ არ იფიქროთ, რომ მე რექტორობის სურვილმა რაღაც ამბიციები შემიქმნა, გარკვეულწილად ეს იქნება სამართლიანობის აღდეგენის პროცესის დასაწყისი, მე ასე მიმაჩნია.

 

ასეთი უგულისყურო დამოკიდებულება მარტო ჩემს მიმართ არ მომხდარა, ჩემს გვერდით ძალიან ბევრი კადრი გაუშვეს აქედან, რომლებიც დღესაც უმუშევრები არიან. ამიტომ, დამთავრდეს უნდა კოჰაბიტაცია, დამთავრდეს უნდა მაფიოზური და კლანური მოღვაწეობა უნივერსიტეტში და დაიწყოს ათვლის ახალი წერტილი. წესიერი, ნიჭიერი, საქმის მცოდნე, კვალიფიციური კადრები უნდა მოღვაწეობდნენ უნივერსიტეტში“  – განაცხადა ბესიკ ბერიძემ.  

ნეტგაზეთის მასალების სხვა გამოცემებში გადაბეჭდვის წესი
"ბათუმელები"