Batumelebi | თამილა მახარაძის ოპერაციისთვის საჭირო 13 ათასი ევრო ჯერ ვერ შეგროვდა თამილა მახარაძის ოპერაციისთვის საჭირო 13 ათასი ევრო ჯერ ვერ შეგროვდა – Batumelebi
RU | GE  

თამილა მახარაძის ოპერაციისთვის საჭირო 13 ათასი ევრო ჯერ ვერ შეგროვდა

 

ამირან მახარაძე ამბობს, რომ კიდევ 13 ათასი ევრო, რაც მისი შვილის გერმანულ კლინიკაში ოპერაციის ჩასატარებლად სჭირდება, ჯერ სრულად არ აქვთ. „თუ აჭარის მთავრობა ჩამომირიცხავს დაპირებულ 10 ათასს, სულ 17 400 ევრო გაგვიხდება“, – ამბობს ამირან მახარაძე. შვილის ოპერაციისთვის მას მთლიანობაში 30 ათასი ევრო სჭირდება.

 

ამირან მახარაძის შვილს, 19 წლის სტუდენტ თამილა მახარაძეს იშვიათი დაავადება ტანჯავს – მის მარჯვენა ხელზე უჯრედებმა კვდომა დაიწყო. ამ დროისთვის თეონა მახარაძეს მარჯვენა ხელი იდაყვის ჩათვლით უჩვეულოდ აქვს შეშუპებული. გოგონას ახლობლები ტკივილის ლოკალიზებას ძლიერი გამაყუჩებელი პრეპარატებით ახერხებენ.

 

თამილა მახარაძე
თამილა მახარაძე

გერმანულ საუნივერსიტეტო კლინიკაში სათანადო კვლევის შედეგად ამირან მახარაძეს ექიმებმა უთხრეს, რომ ოპერაციული ჩარევის გზით შესაძლებელია არათუ გოგონას სიცოცლის გადარჩენა, არამედ ხელის შენარჩუნებაც კი. სწორედ ამ მიზნით  მიმართა ამირან მახარაძემ საზოგადოებას დასახმარებლად. ის დღეს ამბობს, რომ მედიაკამპანიის შედეგად ადამიანებმა 5-5 ლარი ძლივს ჩარიცხეს. ბიზნესწრეებიდან ამ ეტაპზე ქველმოქმედებაში არავინ ჩართულა.

 

ამირან მახარაძე ამბობს, რომ რადგანაც სრული თანხის დაფარვა ვერ ხერხდება, კლინიკამ კიდევ ერთი შეღავათი გაუწია – თანხა 20 ათასი ევრო კლინიკის ანგარიშზე მაქსიმუმ 20 თებერვალს უნდა გადაირიცხოს. ხოლო დარჩენილი ნაწილის გადახდა შესაძლებელი იქნება ოპერაციის ჩატარების ეტაპზე, ანუ მარტში.

 

ამირან მახარაძე ამბობს, რომ არაფერი დარჩა ისეთი, რისი გაყიდვითაც დარჩენილი 13 ათასი ევროს მობილიზებას შეძლებდა.

 

აჭარის მთავრობის პრესცენტრის ინფორმაციით, დღეს, 19 თებერვალს ან ხვალ შეთანხმებულ თანხას აუცილებლად გადარიცხავენ თამილა მახარაძის ანგარიშზე.

ნეტგაზეთის მასალების სხვა გამოცემებში გადაბეჭდვის წესი
ეთერ თურაძე