ირაკლი ბარამიძის განცხადებით, საქმე ეხება 2011 წელს ქედის მუნიციპალიტეტში ჩოგბურთის კორტებისა და ფრენბურთის მოედნის მშენებლობას.
„მოედნების მშენებლობა 2011 წელს განხორციელდა, სამუშაოები ელექტრონულ ტენდერში გამარჯვებულმა კომპანია „გულებმა“ შეასრულა. სატენდერო თანხა 80 ათას ლარს შეადგენდა.
თანაპარტიელის პროკურატურაში დაბარებას „ნაციონალური მოძრაობის“ წევრები პოლიტიკურ ანგარიშსწორებად აფასებენ. ამ საკითხთან დაკავშირებით დღეს უმაღლესი საბჭოს უმცირესობის წევრებმა ბრიფინგი გამართეს:
„ჩვენ ირაკლი ბარამიძის პროკურატურაში დაბარებას პირდაპირ ვუკავშირებთ უმაღლეს საბჭოში განვითარებულ პროცესებს, რადგან „ქართულმა ოცნებამ“ 4 თებერვალს უმაღლეს საბჭოში დაკარგა უმრავლესობა და ჩვენ დავაანონსეთ შესაძლო საკადრო ცვლილების შესახებ, ამისთვის გადავდგით პირველი ნაბიჯი და შევიტანეთ წერილი, უმაღლესი საბჭოს ხუთი წევრი აწერდა ხელს იმას, რომ გადაყენებულიყო ერთ-ერთი კომისიის წევრი. ამ ფონზე გააქტიურდა საქმე, რომელიც ჩვენს კოლეგას მაღალმთიანი რეგიონიდან, ფრაქციის თავმჯდომარეს, ირაკლი ბარამიძეს უკავშირდება და ის დაიბარეს პროკურატურაში მოწმის სტატუსით. გამოძიება 2014 წელს არის დაწყებული, თუმცა მხოლოდ დღეს გააქტიურეს“ – აცხადებს უმაღლესი საბჭოს წევრი პეტრე ზამბახიძე.
მისივე განცხადებით, „ქართულმა ოცნებამ“ უმაღლეს საბჭოში თითოეულ ხმაზე დაიწყო ნადირობა, რადგან „თითოეული ხმა წყვეტს დღეს უმაღლეს საბჭოში უმცირესობა -უმრავლესობის ბედს“.
„ჩვენ ამას ვუკავშირებთ უმაღლეს საბჭოში „ქართული ოცნების“ წევრების მხრიდან თანამდებობების დაკარგვის შიშს“ – აცხადებს პეტრე ზამბახიძე.
