Batumelebi | ომბუდსმენის რეკომენდაცია, მინისტრის ანგარიში და ბავშვთა ძალადობის სტატისტიკა ომბუდსმენის რეკომენდაცია, მინისტრის ანგარიში და ბავშვთა ძალადობის სტატისტიკა – Batumelebi
RU | GE  

ომბუდსმენის რეკომენდაცია, მინისტრის ანგარიში და ბავშვთა ძალადობის სტატისტიკა

 

 ამ წუთებში პარლამენტის ადამიანის უფლებათა  კომიტეტი საქართველოს ჯანდაცვის მინისტრის მოადგილის ზაზა სოფრომაძის ანგარიშს უსმენს. ჯანდაცვის მინისტრის მოადგილე პარლმანტის წევრებს  სახალხო დამცველის რეკომენდაციების შესრულების ანგარიშს აბარებს. ჯანდაცვის სამინისტროს შემდეგ იუსტიციის მინისტრის მოადგილეს, ალექსანდრე ბარამიძეს მოუსმენენ.

 

კითხვები უკვე დასვეს სახალხო დამცველმა უჩა ნანუაშვილმა, მისმა მოადგილეებმა და სახალხო დამცველის ბავშთა ცენტრის ხელმძღვანელმა მაია გედევანიშვილმა.


მაია გედევანიშვილმა, რომელსაც ხელში დოკუმენტი ეჭირა, განაცხადა, რომ გასულ წელს  ბავშვთა ძალადობის  65 შემთხვევა დაფიქსირდა [ძალადობის ან სავარაუდო ძალადობის]. ეს სტატისტიკა ჯანდაცვის სამინისტროს სოციალურმა მუშაკებმა პოლიციის სატელეფონო თუ წერილობითი შეტყობინებით მიიღეს: „ჩვენ წელიწადნახევარია დავდივართ რეგიონებში, სოციალური მუშაკების 80% გადამზადებულია, თუმცა ეს არაა საკმარისი“, – უთხრა მაია გედევანიშვილმა მინისტრის მოადგილეს. მისი აზრით, სოციალური მუშაკების [რომლებიც  ძალადობაზე მუშაობენ] მოტივაცია, პასუხისმგებლობა და კვალიფიკაცია გასაზრდელია.

 

მაია გედევანიშვილმა ახსენა ხულო, მაღალმთიან რეგიონებში მდებარე ძნელად მიუვალი სოფლები და ითხოვა სოციალური მუშაკებისთვის მაღალი გამავლობის მანქანებით სარგებლობის შესაძლებლობა: „ცაშია გამოკიდული ზოგიერთი სოფელი,  შესაძლოა ფეხითაც  ვერ მიხვიდე, ამ ადამიანს სჭირდება მანქანა“…

 

ჯანდაცვის მინისტრის მოადგილემ განაცხადა, რომ წელს გაიზრდება სოციალური მუშაკის უფლება. პროექტის მიხედვით გადაუდებელი აუცილებლობის შემთხვევაში, სოციალურ მუშაკს ბავშვის ოჯახიდან გაყვანის უფლება მიენიჭება. მისივე განმარტებით, საქართველოს კანონში ცვლილებების შეტანა ინიცირებულია და მთავრობაში განსახილველად უკვე წარდგენილია.


წელს, ჯანდაცვის სამინისტროს გადაწყვეტილებით, იზრდება სოციალური მუშაკების რაოდენობაც [93 სოციალური მუშაკის დამატება იგეგმება]. მათ გადამზადებაზე ზრუნვას ჯანდაცვის სამინისტრო აპირებს. სიახლეა ისიც, რომ ახალი წლიდან სოციალური მუშაკების თანამდებობრივი სარგო გაიზარდა“, ოჯახში ძალადობის მსხვერპლთა დახმარების მიზნით“.

 

ნეტგაზეთის მასალების სხვა გამოცემებში გადაბეჭდვის წესი
ნათია როყვა