ბათუმში მცხოვრები გულნარა ლეფსაია, რომელიც პროექტის – „ქვეითები VS მძღოლები – ჩვენ გვესმის ერთმანეთის“ ერთ-ერთი ავტორია, კიდევ ერთ ბათუმელთან – მარიკა ჩხუბაძესთან ერთად ფიქრობს, რომ მათ იდეას ბევრი მოქალაქე გამოეხმაურება და საბოლოო ჯამში მოხერხდება ის, რომ მოქალაქეები უფრო მეტად შეეცდებიან არ დაარღვიონ მოძრაობის წესები და ამით არ შეუქმნან საფრთხე როგორც საკუთარ, ისე სხვის სიცოცხლეს.
გულნარა ლეფსაია ამბობს, რომ ამას მარტო ვერ გასწვდებიან, ამიტომაც სჭირდებათ საზოგადოების მხარდაჭერა და ფიქრობენ, რომ მიიღებენ კიდეც ამ მხარდაჭერას: „ჩვევ ვაპირებთ ვიმუშავოთ მოხალისეებთან ერთად. საწყის ეტაპზე „ზებრასა“ და შუქნიშნის მოთხოვნების მიმართ კანონდამრღვევი ქვეითებსა და მძღოლებს გამოვავლენთ, გადავიღებთ ფოტო/ვიდეო მასალას და განვათავსებთ სოციალურ ქსელში“ან ვებგვერდზე – https://ertad.ge.
გულნარა ლეფსაიას თქმით, მათ მიერ მომზადებულ ვიდეორგოლებს აჩვენებენ საზოგადოებრივი თავშეყრის ადგილებში. ცოტა მოგვიანებით, მსახიობების მონაწილეობით დაგეგმილია ფლეშმობის მოწყობაც, ბუნებრივია, ესეც საზოგადოებრივი თავშეყრის ადგილებში გაიმართება.
გულნარა ლეფსაია: „პროექტის მთავარი არსი მდგომარეობს იმაში, რომ ბათუმში გაუმჯობესდეს საზოგადოებრივი წესრიგი, ქუჩებში ქვეითების გადაადგილებისა და ავტომობილების მოძრაობის პირობებში. ქვეითთა გადაადგილება გახდეს უფრო უსაფრთხო. ხელი შევუწყოთ ქაოსურად მოძრაობის შემცირებას, საგზაო მონიშვნების (ზებრა) ხილვადობის ხარისხის გაუმჯობესებასა და შუქნიშნებზე ქვეითთა გადასასვლელი ნიშნების მოქმედების განრიგის/სისტემის მოწესრიგებას“.
გულნარა ლეფსაია ფიქრობს, რომ ამ ყველაფერს გარკვეულწილად წახალისებაც სჭირდება, სწორედ აქედან გამომდინარე დაგეგმილი აქვთ მცირედი საჩუქრების გაცემაც. საჩუქრებს მიიღებენ ის მძღოლები და ფეხით მოსიარულეები, ვისი მონაწილეობითაც გადაღებული ფოტო-ვიდეომასალა სოციალურ ქსელში ყველაზე მეტ მოწონება/ლაიქს დაიმსახურებს.
