ახალგაზრდა იურისტთა ასოციაციის აჭარის ფილიალის ახალ ხელმძღვანელს რამდენიმე დღეში აირჩევენ. აჭარის ფილიალიდან თავმჯდომარის პოსტის დასაკავებლად კანდიდატი უკვე არჩეულია, თუმცა მის ვინაობას ჯერ არ ასაჯაროებენ. კანდიდატი საბოლოოდ საიას სათავო ოფისის გამგეობამ უნდა დაამტკიცოს.
აჭარის ოფისის გამგეობის ახალი წევრის, იურისტ მაია ქათამაძის განცხადებით, მათი სამსახურიდან წასვლა საიას გამგეობის წევრებად არჩევას უკავშირდება.
„ეს ჩვეულებრივი პროცედურაა, თუ გინდა გამგეობაში მოხვდე, მაშინ საიას თანამშრომელი არ უნდა იყო. არჩევნებში კი მონაწილეობას ვერ მიიღებ, თუ არ ხარ გამგეობის წევრი“, – ამბობს მაია ქათამაძე.
გამგეობის წევრები, წესდების მიხედვით, ორ წელიწადში ერთხელ იცვლებიან. საიას აჭარის ფილიალში გამგეობის ახალ წევრებს 21 დეკემბერს აირჩევენ. გამგეობაში სულ ხუთი წევრია: საიას ბათუმის ფილიალის ყოფილი თავმჯდომარე გია ქარცივაძე, გიორგი ხიმშიაშვილი, მაია ქათამაძემ, დათო მესხიძე და ირაკლი ანანიძე.
„კანდიდატების თაობაზე საია ამ დღეებში იმსჯელებს. დღეს ან ხვალ ცნობილი გახდება, ვინ იქნება საიას ახალი თავმჯდომარე“, – ამბობს საქართველოს ახალგაზრდა იურისტთა ასოციაციის საზოგადოებასთან ურთიერთობის სამსახურის ხელმძღვანელი ნათია ქანთარია.
საიას აჭარის ფილიალის ხელმძღვანელი ბოლო ორი წლის განმავლობაში გია ქარცივაძე იყო. წესდების მიხედვით, საიას თავმჯდომარესა და ფილიალის ხელმძღვანელებს თანამდებობაზე ერთი წლით ირჩევენ. ერთსა და იმავე პიროვნებას კი ზედიზედ ორჯერ ან სამჯერ შეუძლია იყაროს კენჭი ამ თანამდებობაზე.
