„ქობულეთის მუნიციპალიტეტის გამგეობამ გამოაცხადა კონკურსი გამგებლის თანაშემწის ვაკანტურ თანამდებობაზე, რომელსაც, კონკურსის პირობების თანახმად, შეუძლია არ ჰქონდეს დიპლომი და ჰქონდეს მხოლოდ სკოლის ატესტატი. მინდა ვუთხრა სულხან ევგენიძეს, გამგებელს, რომელიც აირჩია ხალხმა, ეს არის რაიონის სირცხვილი! ჩვენ ვითხოვთ გაუქმდეს ეს საკონკურსო პირობები, რაც სამარცხვინო ფაქტია. მე იმედი მაქვს ქობულეთის საკრებულო მიიღებს სწორ გადაწყვეტილებას“ – განაცხადა რევაზ ხარაზმა.
„ქობულეთში მუნიციპალიტეტის გამგეობა საშუალო სკოლა დამთავრებულს სთხოვს სამართლებრივი აქტების ცოდნას – ეს არის საქართველოს კონსტიტუცია, საქართველოს ორგანული კანონი, ადგილობრივი თვითმართველობის კოდექსი, ადგლობრივი თვითმართველობის შესახებ ევროპული ქარტია, საჯარო სამსახურის შესახებ საქართველოს კანონი, საქართველოს ზოგად ადმინისტრაციული კოდექსი და საქართველოს შრომის კოდექსი და, ასევე, ქობულეთის მუნიციპალიტეტის გამგეობის დებულება. საშუალო სკოლა დამთავრებულმა როგორ უნდა შეძლოს ეს?!“ – განაცხადა ორგანიზაციის წევრმა, მერაბ ცინცაბაძემ.
ქობულეთის მუნიციპალიტეტში ვაკანტურ თანამდებობებზე კონკურსი პირველ დეკემბერს გამოცხადდა. კონკურსის პირობების თანახმად, არც გამგებლის თანაშემწის და არც საკრებულოს თავმჯდომარის თანაშემწისათვის უმაღლესი განათლების ქონა სავალდებულო არ არის.
