Batumelebi | ტოლერანტობის ქომაგის ტიტული ქობულეთის მე-5 საჯარო სკოლის დირექტორმა მიიღო ტოლერანტობის ქომაგის ტიტული ქობულეთის მე-5 საჯარო სკოლის დირექტორმა მიიღო – Batumelebi
RU | GE  

ტოლერანტობის ქომაგის ტიტული ქობულეთის მე-5 საჯარო სკოლის დირექტორმა მიიღო


სახალხო დამცველთან არსებული ტოლერანტობის ცენტრის რელიგიათა საბჭომ ტოლერანტობის ქომაგის ტიტულით ქობულეთის #5 საჯარო სკოლის დირექტორი, ნარგიზ ჯინჭარაძე დააჯილდოვა. 

 

ნარგიზ ჯინჭარაძე ამბობს, რომ ტოლერანტობის ქომაგის ტიტული მისთვის ძალიან მნიშვნელოვანი ჯილდოა. იგი თბილისში გამართულ შეხვედრას თავადაც დაესწრო: „შეხვედრას ესწრებოდნენ ელჩები, რელიგიური კონფესიის წარმომადგენლები. ძირითადად ორგანიზაციებს აჯილდოვებენ ამ ტიტულით და ჩემთვის ძალიან სასიხარულო იყო, რომ მოხდა ჩემი, როგორც პიროვნების დაჯილდოვება ტოლერანტობის ქომაგის ტიტულით“ – ამბობს ნარგიზ ჯინჭარაძე.

 

მისი აზრით, ამ ტიტულის მიღების საფუძველი გახდა ის ღონისძიებები, რაც წლების განმავლობაში ტარდებოდა მის სკოლაში:

 

„ჩვენს სკოლაში ეთნიკური უმცირესობის, ბოშების წარმომადგენლები სწავლობენ. სხვადასხვა დონორი ორგანიზაციის დახმარებით მოვიყვანეთ ისინი სკოლაში. ბექა მინდიაშვილმა, ტოლერანტობის ცენტრის ხელმძღვანელმა ხაზგასმით აღნიშნა ის ფაქტიც, რომ სხვადასხვა აღმსარებლობისა და ეთნოსის წარმომადგენელ ბავშვებს ჩვენთან ხვდებათ კომფორტული გარემო. ეს ერთი დღის საქმე არ არის, ხუთი-ექვსი წელია ჩვენ ამ საკითხებზე ვმუშაობთ“ – ამბობს ნარგიზ ჯინჭარაძე.

 

სკოლის დირექტორი ფიქრობს, რომ მისი დაჯილდოვება პირველ რიგში სკოლის მოსწავლეების დამსახურებაა: „ბავშვები ჩვენგან განსხვავებით ძალიან ტოლერანტულები არიან, ბავშვებთან ერთად პედაგოგების  დამსახურებაა ეს ტიტული, რადგან მათ კარგად ესმით, რომ ყველაზე დიდი ჰუმანურობაა  განსხვავებულის მიღება და მათი ინტეგრაციის ხელშეწყობა. ჩვენი მუშაობა მოხალისეობრივია, ყოველგვარი ანაზღაურების გარეშე ვაწარმოებთ ამ სამუშაოებს, ძალიან მნიშვნელოვანი იყო ამ შრომის დაფასება, მით უფრო, როცა ჯილდოვდები სახალხო დამცველისგან.

 

სკოლა პერიფერიაში მდებარეობს, ძალიან ბევრი სოციალურად დაუცველი ოჯახია ჩვენს გარშემო, ბევრჯერ  მიმიღია შემოთავაზება უფრო მაღალანაზღაურებად სამსახურში, უფრო პრესტიჟულ სკოლაშიც მთავაზობდნენ გადასვლას, მაგრამ  ვფიქრობ, რომ ამ სკოლაში ჩემი შესაძლებლობები არ ამომიწურავს, ჯერ ბევრი გვაქვს გასაკეთებელი, რომ მივაღწიოთ ჩვენი მოსწავლეების სამოქალაქო ინტეგრაციას“  – ამბობს ნარგიზ ჯინჭარაძე. 

 

ნეტგაზეთის მასალების სხვა გამოცემებში გადაბეჭდვის წესი
ქეთი ლაბაძე