Batumelebi | გომარდულში კოტეჯები ვალის გამო შესაძლოა ვერ გაიხსნას – აქციონერები მთავრობის დახმარებას ელიან გომარდულში კოტეჯები ვალის გამო შესაძლოა ვერ გაიხსნას – აქციონერები მთავრობის დახმარებას ელიან – Batumelebi
RU | GE  

გომარდულში კოტეჯები ვალის გამო შესაძლოა ვერ გაიხსნას – აქციონერები მთავრობის დახმარებას ელიან

 

ჯერ კიდევ უცნობია, იმუშავებს თუ არა წელს შუახევის მუნიციპალიტეტში, სოფელ გომარდულში ტურისტებისათვის განკუთვნილი კოტეჯები. სააქციო საზოგადოება „გომარდულს“ სახელმწიფოს ვალი აქვს, აქციონერები კრედიტს ითხოვენ და სახელმწიფოს დახმარებას სთხოვენ.  

გომარდული
გომარდული

შუახევის მუნიციპალიტეტში, რამდენიმე წლის წინ სამთო კურორტად გამოცხადებულ სოფელ გომარდულში პირველი თოვლი მოვიდა, თოვლის საფარი უკვე მეტრნახევარს აღწევს, მაგრამ აქ ჯერ კიდევ არ იციან, მიიღებს თუ არა კურორტი გომარდული წელს ტურისტებს კოტეჯებში.  

„გომარდულის“ აქციონერი, რამაზ მსახურაძე ამბობს, რომ უნდათ კურორტი წელსაც გაიხსნას, მაგრამ  მათი ქონება დაყადაღებულია: „მიწის გადასახადი გვაქვს. საგადასახადომ გვიჩივლა, დაყადაღებულია თითქმის მთლიანი ქონება, ანგარიშები, ამიტომ ფინანსურ საქმიანობას ვერ  ვაწარმოებთ. ისინი ითხოვენ 300 ათას ლარს.“

რამაზ მსახურაძე ამბობს, რომ ამ თემაზე უკვე ჰქონდათ შეხვედრა აჭარის მთავრობასთან: „ჩვენ გვქონდა მთავრობასთან საუბარი, ვითხოვთ, გამოგვიყონ კრედიტი, ბატონი არჩილ ხაბაძე შეგვპირდა დახმარებას. ჯერ-ჯერობით ველოდებით მთავრობისგან პასუხს, განხილვას სჭირდება დრო“ – ამბობს რამაზ მსახურაძე „ბათუმელებთან“.  

სააქციო საზოგადოება „გომარდულს“ შვიდი აქციონერი ჰყავს. ეს ტერიტორია მათ 2011 წელს სახელწიფოსგან სიმბოლურ თანხად, 1 ლარად მიიღეს, ვალდებულებების სანაცვლოდ.

სოფელი გომარდული შუახევში, ბათუმიდან 74 კილომეტრის დაშორებით, ზღვის დონიდან 1.250 მეტრის სიმაღლეზე მდებარეობს.    

ნეტგაზეთის მასალების სხვა გამოცემებში გადაბეჭდვის წესი
მოხალისე , თაკო ათაბაგი