დღეს 27 ოქტომბერს, „პრესკაფეში“, სახალხო დიპლომატიის ფარგლებში ქართულ-აფხაზურ საკითხებზე შეხვედრა გაიმართა. შეხვედრაში საქართველოში მცხოვრები ის სამი აფხაზი ბავშვიც მონაწილეობდა, რომლებიც სახალხო დიპლომატიის ფარგლებში ავსტრიასა და სლოვაკეთში მცხოვრებ აფხაზ და ოს ბავშვებს შეხვდნენ.
„ქართულ-აფხაზური სახალხო დიპლომატიის ფარგლებში ჩვენ ვახორციელებთ პროგრამას, „ქართულ-აფხაზური საგა“. პროექტის ფარგლებში აფხაზეთის მთავრობასთან და საქართველოს საპატრიარქოსთან ერთად ბათუმში მცხოვრები სამი აფხაზი ახალგაზრდა, ორი სტუდენტი და ერთი მოსწავლე, ავსტრიასა და სლოვენიაში გავამგზავრეთ, სადაც ისინი თავიანთ თანატოლ აფხაზებსა და ოსებს შეხვდნენ.
ეს ახალგაზრდები უკვე ჩამოვიდნენ და ახლა მოვისმენთ მათი თანატოლების მოსაზრებებს ქართულ-აფხაზურ ურთიერთობებზე. გარდა ამისა, ჩვენი ორგანიზაცია ამ პროექტის ხუთი წლისთავსაც აღნიშნავს“ – აცხადებს ქალთა საერთაშორისო ორგანიზაცია, „სოროპტიმისტ ინტერნაციონალის“ წარმომადგენელი ნათელა დუმბაძე.
„შეხვედრა სლოვაკეთში შედგა. ჩვენ ძალიან დიდი სითბო და სიხარული დავინახეთ ჩვენი თანატოლების თვალებში. ძალიან დავუახლოვდით ერთმანეთს და ეს დღე არასდროს წაიშლება ჩვენი მეხსიერებიდან“- ამბობს ქსენია ბედია.
მოსწავლეები ამბობენ, რომ სლოვენიაში შეხვედრა იქ მცხოვრებმა ქართველმა ბიზნესმენმა ნოდარ გიორგაძე დააფინანსა „გვითხრა, ჩემი ოცნება, თქვენს ოცნებებთან დაახლოებააო“- გვითხრა ჯამილა მუსხაჯბამ.
სლოვაკეთში ქართველ და აფხაზ ბავშვებთან შეხვედრას ქართველი პედაგოგებიც ესწრებოდნენ.
