Batumelebi | აჭარის უშიშროების ყოფილ მინისტრს 6 წლით, აბაშიძის დაცვის უფროსს კი – 2 წლით პატიმრობა მიუსაჯეს აჭარის უშიშროების ყოფილ მინისტრს 6 წლით, აბაშიძის დაცვის უფროსს კი – 2 წლით პატიმრობა მიუსაჯეს – Batumelebi
RU | GE  

აჭარის უშიშროების ყოფილ მინისტრს 6 წლით, აბაშიძის დაცვის უფროსს კი – 2 წლით პატიმრობა მიუსაჯეს

 

 

„არ ინერვიულო დე, მე კარგად ვარ, ჯანმრთელად ვარ, თავს მიხედეთ, ერთმანეთს მოუარეთ“, – მიმართა ნათესავებს სასამართლო დარბაზიდან გასვლისას ბრალდებულმა დავით ხალვაშმა. დღეს ის მოსამართლე დავით მამისეიშვილმა პატიმრობაში დატოვა.

 

დავით ხალვაშის სასამართლო პროცესი
დავით ხალვაშის სასამართლო პროცესი / ფოტო ”ბათუმელების” არქივიდან

 

დღეს ბათუმის საქალაქო სასამართლომ დავით ხალვაშს მეტსახელად „ქელფეთას“ 2 წლით, შვიდი თვითა და 15 დღით პატიმრობა მიუსაჯა. დავით ხალვაში აჭარის მთავრობის ყოფილი თავმჯდომარის ასლან აბაშიძის დაცვის უფროსი იყო. სახელმწიფო მას და სოსო (იოსებ) გოგიტიძეს, ასლან აბაშიძის მთავრობის უშიშროების მინისტრს, ბრალს სდებდა მასობრივი არეულობასა და უკანონო შეიარაღებული ჯგუფის ფორმირებაში.

 

სასამართლო პროცესი ხუთი თვის განმავლობაში მიმდინარეობდა და მას მოსამართლე დავით მამისეიშვილი უძღვებოდა.

 

დავით ხალვაშის ადვოკატი ვაჟა ხახუტაიშვილი ამბობოს, რომ გადაწყვეტილებას ზემდგომ ინსტანციაში გაასაჩივრებენ.

 

სასამართლო პროცესზე არ იმყოფებოდა იოსებ გოგიტიძე. ის ძებნილია და ექვსი წლით თავისუფლების აღკვეთა დაუსწრებლად მიესაჯა.

 

იოსებ გოგიტიძის ადვოკატი ირაკლი პირველი განამარტავს, რომ გადაწყვეტილების გასაჩივრება მხოლოდ მისი დაკავების ან ნებაყოფლობით გამოცხადების შემთხვევაშია შესაძლებელი.

 

იოსებ გოგიტიძე ასლან აბაშიძის ცოლის ძმმა და მის მიმართ, ისე როგორც დავით ხალვაშისა და თავად ასლან აბაშიძის წინააღმდეგ, სისხლის სამართლებრივი დევნა 2004 წლის 6 მაისის ვარდების რევოლუციის შემდეგ დაიწყო. 

ნეტგაზეთის მასალების სხვა გამოცემებში გადაბეჭდვის წესი
ნინო ხიმშიაშვილი