Batumelebi | აჭარაში ყველაზე მეტი ტურისტი თურქეთიდან, აზერბაიჯანიდან და რუსეთიდან ჩამოვიდა აჭარაში ყველაზე მეტი ტურისტი თურქეთიდან, აზერბაიჯანიდან და რუსეთიდან ჩამოვიდა – Batumelebi
RU | GE  

აჭარაში ყველაზე მეტი ტურისტი თურქეთიდან, აზერბაიჯანიდან და რუსეთიდან ჩამოვიდა

 

აჭარის ტურიზმისა და კურორტების დეპარტამენტი 2014 წელს, იანვრიდან აგვისტომდე აჭარაში შემოსული ტურისტების სტატისტიკას აქვეყნებს.  დეპარტამენტის მონაცემებით, 2014 წლის იანვარ-აგვისტოს პერიოდში გასული წლის ანალოგიურ პერიოდთან შედარებით ტურისტთა 10,41%-იანი ზრდა დაფიქსირდა.  სტატისტიკა სასტუმროების მიერ მოწოდებული დატვირთულობის მონაცემების მიხედვითაა მომზადებული. 

 

ტურიზმი
ტურიზმი

სტატისტიკის მიხედვით რაოდენობრივი მაჩვენებლებით ლიდერობს თურქეთი, აზერბაიჯანი, რუსეთი, უკრაინა, სომხეთი და პოლონეთი. გასულ წელთან შედარებით პროცენტული ზრდის მაჩვენებლებით კი გამოირჩევა ყაზახეთი (+63,4%), რუსეთი (+37,6%), სომხეთი (36,8%), აზერბაიჯანი (+35,7%), ბელორუსია (+35,7%), პოლონეთი (+28,4%), უკრაინა (+17,6%), ლიტვა (14,5%). სასტუმროების მონაცემებით აჭარას სულ 344 274 ტურისტი სტუმრობდა.

 

ეს მონაცემები არ შეიცავს კერძო სექტორში განთავსებულ ტურისტთა რიცხვს, სადაც წელს განსაკუთრებული სიმრავლე შეიმჩნეოდა. დეპარტამენტის ინფორმაციით, მიმდინარეობს სტატისტიკური კვლევის ახალ მეთოდოლოგიაზე მუშაობა, რომელიც სამომავლოდ კერძო სექტორსაც მოიცავს.

 

დამატებითი მოკვლევა ჩატარდა საქართველოს შსს-ს საზღვრის დეპარტამენტის მიერ მოწოდებული ინფორმაციის მიხედვით. ბათუმის აეროპორტში საერთაშორისო ფრენებით შემოსულ უცხოელ მგზავრთა რაოდენობა იანვარ-აგვისტოს მონაცემებით 30%-ით გაიზარდა გასულ წელთან შედარებით, ხოლო 11%-ითაა გაზრდილი ბათუმში საზღვაო ტრანსპორტით შემოსულ უცხოელ მგზავრთა რაოდენობა.

 

საზღვრის დეპარტამენტის მონაცემების მიხედვით განსაკუთრებული ზრდით გამოირჩევა შემდეგი ქვეყნები: უკრაინა (+101%), ბელორუსია (+86%), პოლონეთი (+80%), აზერბაიჯანი (+38%), ყაზახეთი (+28%), რუსეთი (+15%), ისრაელი (+9%). განსაკუთრებული ზრდის მაჩვენებლები აქვს კუვეიტს (+149%) და საუდის არაბეთს (+67%). გასულ წელთან შედარებით ზრდის დადებითი ტენდენცია შეიმჩნევა ასევე ევროპის ქვეყნებიდან შემოსული ტურისტების სტატისტიკაში : ესტონეთი (+186%), დიდი ბრიტანეთი (+57%), ლიტვა (+39), გერმანია (+ 21%).

ნეტგაზეთის მასალების სხვა გამოცემებში გადაბეჭდვის წესი
"ბათუმელები"