Batumelebi | „აჭარის მთავრობამ ორ მილიარდამდე ღირებულების ინვესტიციის განხორციელება შეაფერხა” „აჭარის მთავრობამ ორ მილიარდამდე ღირებულების ინვესტიციის განხორციელება შეაფერხა” – Batumelebi
RU | GE  

„აჭარის მთავრობამ ორ მილიარდამდე ღირებულების ინვესტიციის განხორციელება შეაფერხა”

 

დღეს, 10  სექტემბერს, ბათუმის დემოკრატიული ჩართულობის ცენტრში აჭარის მთავრობის საინვესტიციო პოლიტიკის დეპარტამენტის ყოფილმა უფროსმა, არასამთავრობო ორგანიზაცია „INVEST GUARD“-ის დამფუძნებელმა ჯემალ ბერიძემ იმ ინვესტიცების შესახებ ისაუბრა,  რომლის განხორციელებაც, მისი თქმით, აჭარის მთავრობის მიზეზით  ვერ მოხერხდა რეგიონში. ჯემალ ბერიძე ამბობს, რომ ამ ინვესტიციების ღირებულება ჯამში 1, 923, 290, 000 დოლარია. 

 

„ეს იყო უკრაინული, პოლონური, რუსული, ებრაული და არაბული ინვესტიციები, ჯამში 1 მილიარდ 900 მილიონზე მეტი ინვესტიცია, რაც შესაძლებელი იყო უახლოესი ხუთი წლის მანძილზე  განხორციელებულიყო ჩვენს რეგიონში“  – განაცხადა ჯემალ ბერიძემ. მან ჟურნალისტებს იმ საინვესტიციო წინადადებების ჩამონათვალი წარმოუდგინა, რის განხორცელებაზეც, მისი თქმით, აჭარის მთავრობამ  თავი შეკავა. მან ასევე აღნიშნა, რომ ამ ინვესტიციების შესახებ მოლაპარაკება ჯერ კიდევ ყოფილი მთავრობის დროს დაიწყო.

 

ჩამონათვალში ყველაზე მსხვილი საინვესტიციო წინადადებაა გონიო პოლიგონზე დაგეგმილი მშენებლობა, რომლის ღირებულებადაც 850 მილიონი ლარია მითითებული. ასევე, ბათუმში, ახალ ბულვარში საცხოვრებელი სახლისა და სასტუმროს მშენებლობა – 82, 500 მილიონი დოლარი, რომელიც რუსულ კომპანია „ანტიკას“ უნდა განეხორციელებინა.

 

ჯემალ ბერიძემ აღნიშნა, რომ არც ერთ ინვესტიციაზე მთავრობას პირდაპირ უარი არ უთქვამს, თუმცა არც თანხმობა განუცხადებია და ამ ინვესტორთაგან ბევრი დღემდე ელოდება მთავრობის პასუხს.

 

„რაც შეეხება  ევროპის მოედანზე გუშინ, მთავრობის თავმჯდომარის მიერ ხსენებულ თითქოს სახლის აშენების პროექტს, აბსოლუტურად არ ვეთანხმები, რადგან ამ კომპანიას, „ანტიკას“, სთხოვეს, რომ შეედგინა ყოფილი ისტორიული შენობის პროექტი, რომელიც ადრე იქ ყოფილა და აბაშიძის მმართველობის დროს აუღიათ. ეს კომპანია აპირებდა სასტუმრო კომპლექსის მშენებლობას ახალ ბულვარში და მთლიანი ინვესტიცია შეადგენდა 82 მილიონ დოლარს. ის არგუმენტები, რაც გუშინ მოიყვანა მთავრობის თავმჯდომარემ, პარკები და სკვერები არ მივეცი ასაშენებლადო, ეს არის აბსურდი.“

 

შეგახსენებთ, რომ გუშინ აჭარის უმაღლესი საბჭოს ფრაქცია „ქართული ოცნების“ წევრმა, საფინანსო-საბიუჯეტო და ეკონომიკურ საკითხთა კომისიის თავმჯდომარემ ალექსანდრე ჩიტიშვილმა მთავრობისათვის უნდობლობის გამოცხადების ერთ-ერთ არგუმენტად რეგიონში ინვესტიციების შეფერხება და დაკარგული სამუშაო ადგილები დაასახელა.

 

აჭარის მთავრობის თავმჯდომარემ არჩილ ხაბაძემ პასუხად განაცხადა, რომ მთავრობის მიერ არც ერთი სტრატეგიული და ეკონომიკურად მომგებიანი პროექტის დაწუნება არ მომხდარა და აჭარის უმაღლესი საბჭოს „ფრაქცია ქართული ოცნების“ წევრების ბოლოდროინდელი მოქმედებები სახელისუფლებო და პოლიტიკური კრიზისის ხელოვნურად შექმნისკენაა მიმართული. 

ნეტგაზეთის მასალების სხვა გამოცემებში გადაბეჭდვის წესი
ნანა კვაჭაძე