Batumelebi | ბათუმში ახალი ხუთვარსკვლავიანი სასტუმრო აშენდება ბათუმში ახალი ხუთვარსკვლავიანი სასტუმრო აშენდება – Batumelebi
RU | GE  

ბათუმში ახალი ხუთვარსკვლავიანი სასტუმრო აშენდება

 

დღეს, ბათუმში, ახალი ხუთვარსკვლავიანი სასტუმრო კომპლექსის მშენებლობას ჩაეყარა საძირკველი. კომპანია „Atlas Georgia“-ის ახალი პროქტის პრეზენტაციას საქართველოსა და ადგილობრივი მთავრობის წარმომადგენლებთან ერთად საქართველოს ეკონომიკის მინისტრი გიორგი კვირიკაშვილი და აჭარის მთავრობის თავმჯდომარე არჩილ ხაბაძე დაესწრნენ, რომლებმაც კომპანიის ხელმძღვანელთან ერთად მშენებლობის საძირკველში სიმბოლური კაფსულა ჩააგდეს.

 

კომპანია “ატლას ჯორჯიას” ხელმძღვანელმა გალიფ ოზთურქმა პრეზენტაციისას აღნიშნა, რომ მათ მიერ განხორციელებული ინვესტიციების გარკვეული ნაწილი განათლების და სოციალური ფონდების დაფინანსებას ხმარდება. კომპანია გააგრძელებს ტრადიციას და პრემიერის მიერ ინიცირებულ პროექტში მიიღებს მონაწილეობას – კომპანია 500 000 ლარს სოლიდარობის ფონდში გადარიცხავს.

 

„ მოხარული ვარ, რომ დღეს ბათუმში კიდევ ერთ მნიშვნელოვან პროექტს ჩაეყარა საფუძველი. მსგავსი პროექტების განხორციელება ძალიან მნიშვნელოვანია ჩვენი ქალაქისთვის, როგორც ეკონომიკური, ასევე ტურისტული თვალსაზრისითაც. ბათუმში ჩამობრძანებულ ტურისტებს კიდევ ერთი სასტუმრო შესთავაზებს ხარისხიან მომსახურებას; გაჩნდება კიდევ ერთი ადგილი საერთაშორისო კონფერენციებისა და კონგრესების ჩასატარებლად; ადგილობრივი მოსახლეობისთვის შეიქმნება რამდენიმე ასეული სამუშაო ადგილი, როგორც მისი მშენებლობის, ასევე დასრულების შემდეგ“ – თქვა არჩილ ხაბაძემ.

 

 

გიორგი კვირიკაშვილის თქმით, საქართველოში ამ ზომის და ასეთი მოწყობის საკონფერენციო დარბაზი პირველად აშენდება – “ასევე აქ განთავსდება სავაჭრო ცენტრი, სადაც მსოფლიო ბრენდები იქნება წარმოდგენილი, რაც იქნება დამატებითი სტიმული ბათუმში ჩამომსვლელი ტურისტებისთვის“ – თქვა მან.

 

ახალი ხუთვარსკვლავიანი სასტუმრო კომპლექსის მშენებლობა, რომელიც 42 მილიონი დოლარის ინვესტიციას მოიცავს, 2019 წლის თებერვალში დასრულდება.

ნეტგაზეთის მასალების სხვა გამოცემებში გადაბეჭდვის წესი
"ბათუმელები"