შპს „ ბათუმის ნავთობგადამამუშავებელი ქარხნის“ დირეტორი, ლევან ჯინჭარაძე დღეს პირველ საათზე ქარხნის შენობაში ბრიფინგს გამართავს. ინფორმაცია ბრიფინგის შესახებ მან სოციალური ქსელის „ფეისბუქის“ საკუთარ გვერდზე გამოაქვეყნა. ლევან ჯინჭარაძის ინფორმაციით ბრიფინგი მის შესაძლო გათავისუფლებას ეხება, რაშიც ის აჭარის მთავრობის თავმჯდომარეს და მის ოჯახს, კონკრეტულად კი არჩილ ხაბაძის მამას თამაზ ხაბაძეს ადანაშაულებს.
ლევან ჯინჭარაძე მის მიერ გამოქვეყნებულ სტატუსში წერს ასევე, რომ აპირებს ბრიფინგზე ჟურნალისტებს გადასცეს დოკუმენტები კორუფციული სქემის შესახებ.
„ჟურნალისტთა კორპუსზე ვაპირებ ყველა იმ მასალის გადაცემას, რომელიც ამხელს თამაზ ხაბაძისა და, ზოგადად, სამინისტროს კორუმპირებულ ჩინოვნიკთა ჩართულობას კორუფციულ სქემაში, რამაც ქარხანა 2012 წლის 1 ოქტომბრის მდგომარეობით გაკოტრებამდე მიიყვანა და რა მასალაც გახდა ჩემი დევნის საფუძველი“, – წერს ლევან ჯინჭარაძე.
ლევან ჯინჭარაძე აჭარის უმაღლესი საბჭოს წევრის, ადამიანის უფლებების დაცვის კომისიის თავმჯდომარის მედეა ვასაძის მაზლია. ის დირექტორის თანამდებობაზე მას შემდეგ დაინიშნა, რაც ხელისუფლება შეიცვალა.
თამაზ ხაბაძე ფინანსთა და ეკონომიკის სამინისტროში საწარმოთა მართვის განყოფილების ხელმძღვანელია.
აჭარის ფინანსთა და ეკონომიკის სამინისტრო ამ საკითხზე კომენტარის გაკეთებას მოგვიანებით შეგვპირდა.
