საპატრულო პოლიციის აჭარის მთავარი სამმართველოს თანამშრომლებმა, 1967 წელს დაბადებული, თურქეთის მოქალაქე ზ. ჩ. განსაკუთრებით დიდი ოდენობით ნარკოტიკული ნივთიერების უკანონო შეძენა-შენახვის და საქართველოში შემოტანის ბრალდებით სარფის საბაჟო გამშვებ პუნქტში დააკავეს.
შს სამინისტროს ინფორმაციით, პოლიციელებმა დაკავებულის ბარგისა და ხელბარგის ჩხრეკისას 42 აბი „სუბოქსინი“ და 2 აბი „ბოქსინი“ ამოიღეს, რომლებიც ექსპერტიზის დასკვნით 0,31 გრ ნარკოტიკულ ნივთიერება ბუპრენორფინს შეიცავს. გამოძიების ინფორმაციით, რომ ბრალდებულმა ნარკოტიკები საქართველოში თურქეთიდან შემოიტანა.
ნარკოლოგიური შემოწმების შედეგად დაკავებულს ოპიუმის ჯგუფის ნარკოტიკული საშუალების მოხმარების ფაქტი დაუდგინდა.
გამოძიება განსაკუთრებით დიდი ოდენობით ნარკოტიკული საშუალების უკანონო შეძენა-შენახვის და განსაკუთრებით დიდი ოდენობით ნარკოტიკული საშუალების საქართველოში შემოტანის ფაქტებზე მიმდინარეობს (საქართველოს სსკ-ის 260-ე მუხლის მე-3 ნაწილის „ა“ ქვეპუნქტით და 262-ე მუხლის მე-4 ნაწილის „ა“ ქვეპუნქტით).
