აჭარის უმაღლესმა საბჭომ ახალი მანქანა „Mitsubishi Lancer“-ი იყიდა, რაშიც ბიუჯეტიდან 29 685 ლარი დახარჯა. უმაღლესი საბჭოს საჯარო ინფორმაციის გაცემაზე პასუხისმგებელმა პირმა ჯამბულ კურცხალიძემ არ იცის, კონკრეტულად რომელი თანამდებობის პირისთვის შეიძინა უმაღლესი საბჭოს აპარატმა ახალი მანქანა.
ბოლო პერიოდში ახალ მანქანას „ერთიანი ნაციონალური მოძრაობის“ ფრაქცია ითხოვდა. „ჩვენ გვაქვს ერთი მანქანა, რომელიც მწყობრიდანაა გამოსული, ფაქტობრივად შორ მანძილზე ამ მანქანით გადაადგილება შეუძლებელია. ამიტომ ვითხოვთ ახალ მანქანას, თუმცა ინფორმაცია იმასთან დაკავშირებით, რომ ახალი მანქანა ჩვენი ფრაქციისთვის შეიძინეს, არ მაქვს, ვნახოთ“ – უთხრა „ბათუმელებს“ ფრაქციის წევრმა ეკატერინე თარგამაძემ.
წელს ტენდერი ახალი ჯიპების შესყიდვის მიზნით აჭარის სატყეო სააგენტომაც გამოაცხადა, რისთვისაც აჭარის გარემოს დაცვის სამმართველოს ბიუჯეტიდან 189 000 ლარი გაითვალისწინა. ამ თანხით სააგენტო 6 ერთეული „ჯიპის“ მარკის ავტომანქანის შესყიდვას გეგმავდა, თუმცა ტენდერში გამარჯვებულმა კომპანიამ სატენდერო პირობები ვერ დააკმაყოფილა, რის გამოც სააგენტომ ტენდერი შეწყვიტა.
„კომპანიამ შემოგვთავაზა ბევრად უფრო კომფორტული ავტომანქანები, მაგრამ ჩვენ ისინი გვჭირდება სატყეოებისთვის, რაც რაღაც დამატებით გადამრთველებს ითხოვს. ამიტომ ტენდერი შევწყვიტეთ,“ – განმარტა გარემოს დაცვის სამმართველოს ხელმძღვანელმა ვახტანგ წულაძემ „ბათუმელებთან“.
