Batumelebi | არჩილ ხაბაძე: „არც კი ვიცი მაქვს თუ არა უფლება დაგპირდეთ“ არჩილ ხაბაძე: „არც კი ვიცი მაქვს თუ არა უფლება დაგპირდეთ“ – Batumelebi
RU | GE  

არჩილ ხაბაძე: „არც კი ვიცი მაქვს თუ არა უფლება დაგპირდეთ“

 

დღეს, ბათუმის ხელოვნების უნივერსიტეტში გამართულ შეხვედრაზე აჭარის მთავრობის თავმჯდომარეს, არჩილ ხაბაძეს არ დაუკონკრეტებია, პროფესორ-მასაწავლებლებისა და სტუდენტების მოთხოვნების რა ნაწილის შესრულების  შეპირება შეეძლო. „არც კი ვიცი მაქვს თუ არა უფლება დაგპირდეთ“, – უთხრა მან მის მოსასმენად მისულ აუდიტორიას. უნივერსიტეტში მთავრობის თავმჯდომარესთან ორი მთავარი მოთხოვნა დააყენეს – ალტენატიული ფართი უნივერსიტეტისთვის და დაფინანსების გაზრდა.  

შეხვედრა ერთ საათზე მეტ ხანს გაგრძელდა. ამ დროის განმავლობაში უნივერისტეტის ლექტორ-მასწავლებლები ცდილობდნენ აჭარის მთავრობის თავმჯდომარე დაერწმუნებინათ, რომ  უნივერისტეტს ფუნქციონირებისთვის შესაბამისი გარემო და პროფესორს იმაზე მეტი ხელფასი სჭირდება, „ვიდრე აჭარის უმაღლეს საბჭოში დამლაგებლის ხელფასია“.

უნივერსიტეტის რექტორმა ერმილე მესხიამ მთავრობის თავმჯდომარეს უნივერსიტეტისთვის ახალი შენობის პროექტის ესკიზი წარუდგინა. უნივერიტეტის ადმინისტრაცია ყოფილი პედაგოგიური კოლეჯის შენობის გადაცემას და მის რესტავრაციას ითხოვს. შენობაში ამჟამად ბათუმის #1 საჯარო სკოლის ფილიალია განთავსებული.

„თუ თქვენ ამ წინადედებას განიხილავთ და დათანხმდებით, შეიძლება ეს შენობა ხელოვნების მუზეუმთან და ახალ გალერეასთან ერთ სივრცეში განვიხილოთ და ამ ადგილს ხელოვნების კვარტალი ვუწოდოთ“, – მიმართა არჩილ ხაბაძეს უნივერსიტეტის რექტორმა.

ხელოვნების მუზეუმის დირეტორის ნინო ნიჟარაძის განცხადებით კი, რომელიც ასევე ესწრებოდა შეხვედრას, ამ გადაწყვეტილებით არჩილ ხაბაძეს შეუძლია ისტორიაში შევიდეს, როგორც ხელოვნების  ქომაგი.

არჩილ ხაბაძე უნივერსიტეტის პროფესორ-მასწავლებლებს შეჰპირდა, რომ ვიდრე უნივერსიტეტის ადმინისტრაციას მთავრობა ალტენატიულ ფართს არ შეთავაზებს, მათ შენობის დატოვების მოთხოვნით არავინ მიმართავს.

შევედრაზე ითქვა, რომ  ხელოვნების უნივერსიტეტისთვის გადასაცემად მთავრობა ყოფილი მეცხრე სკოლის შენობასაც განიხილავს. მოიაზრება შენობების გაცვლის საკითხიც, იმ შემთხვევაში თუ  გათავისუფლდება სამთავრობო დაცვის შენობა ბათუმში.

რაც შეეხება დაფინანსების გაზრდის საკითხს, არჩილ ხაბაძის თქმით, ეს საქართველოს კულტურის სამინისტროს პრეროგატივაა.

უნივერსიტეტის სტუდენტებმა შეხვედრაზე არჩილ ხაბაძეს სთხოვეს, რომ უნივერსიტეტი ფართის გარეშე არ დატოვოს.  მთავრობის თავნჯდომარესთან მათ სხვა კითხვები არ ჰქონიათ.

ნეტგაზეთის მასალების სხვა გამოცემებში გადაბეჭდვის წესი
ცაგო კახაბერიძე