„მისი ფეისბუქ გვერდი, როგორც აუდიო ისე ვიდეო მასალებით აჭრელებულია ადმინისტრაციული რესურსების გამოყენებით. მაგალითად დაჯილდოება ბიბლიოთეკაში, ქალაქში სკვერის რეაბილიტაცია, ბოტანიკურ ბაღში სამუშაოების მონახულება. ყველა ეს პროგრამა ხორციელდება თვითმმართველობის დაფინანსებით და არ შეიძლება რომელიმე კანდიდატმა თავისი პიარისათვისგამოიყენოს, მივმართავ უწყებათაშორისო კომისიას დაინტერესდეს აღნიშნული ფაქტით და მოახდინოს შესაბამისი რეაგირება“- აცხადებს ჯუმბერ კახიძე.
მისი აზრით, წინასაარჩევნო პერიოდში ყველა კანდიდატი თანაბარ პირობებში უნდა იყოს. ფოტომასალები, რომელზეც ჯუმბერ კახიძემ ისაუბრა, ბათუმის მერის წინასაარჩევნო კამპანიის ფეისბუქ გვერდზე „გიორგი ერმაკოვი – ბათუმის მერობის კანდიდატი“ ატვირთულია პირველ და სამ მააისს. თუმცა ჯუმბერ კახიძის განცხადებიდან ორი საათის შემდეგ გვერდი შეიცვალა სათაურით – „გიორგი ერმაკოვი/Giorgi Ermakovi Official“-ით, შესაბამისად განახლდა სოციალურ ქსელში ფოტოების ატვირთვის თარიღიც, რომელზეც ბათუმის მერისა და ასევე ბათუმის მერობის კანდიდატის, გიორი ერმაკოვის მიერ ქალაქში მიმდინარე სხვადასხვა სამუშაობის მონახულებაა ასახული.
არასამთავრობო ორგანიზაცია „საერთაშორისო გამჭვირვალობა საქართველოს“ ბათუმის კოორდინატორის მალხაზ ჭკადუას განმარტებით, გიორგი ერმაკოვს უფლება აქვს გამოიყენოს ადმინისტრაციული რესურსი, ვიდრე ის ოფიციალურად დარეგისტრირდება როგორც კანდიდატი. „ადმინისტრაციული რესურსის გამოყენების საფრთხე ყოველთვის არის. თავის დროზე „საერთაშორისო გამჭვირვალობა საქართველო“ სხვა არასამთავრობო ორგანიზაციებთან ერთად ითხოვდა, რომ უფრო მკაცრი ყოფილიყო კანონმდებლობა და გამიჯნულიყო საჯარო მოხელე და მერობის კანდიდატი. ამიტომ აბსოლუტურად დასაბუთებულია და რეალურია ეჭვები, რომ ადმინისტრაციული რესურსი შეიძლება გამოიყენოს”.
ადგილობრივი თვითმმართველობის არჩევნებში მონაწილე კანდიდატებმა რეგისტრაცია 30 დღით ადრე უნდა გაიარონ. ამას ითვალისწინებს საქართველოს საარჩევნო კოდექსი. როგორც „საერთაშორისო გამჭვირვალობა საქართველოს“ ბათუმის კოორდინატორმა განმარტა, ადმინისტრაციული რესურსის გამოყენება კანონდარღვევად, კანდიდატების რეგისტაციის გავლის შემდეგ ჩაითვლება.
