სადაზღვეო კომპანია – „ჩემი ოჯახის კლინიკას“ ბათუმში, თამარის დასახლების საოჯახო მედიცინის ცენტრის ვალი აქვს. მას კლინიკისთვის ნახევარ წელზე მეტია სამედიცინო მომსახურების თანხა არ გადაურიცხია.
სამედიცინო ცენტრის დირექტორის თამაზ ირემაძის თქმით, აღნიშნული საკითხის გასარკვევად კომპანიასთან დაკავშირება ვერ შეძლო. 21 მარტს კი წერილით, აჭარის ჯანდაცვის სამინისტროს მიმართა და სადაზღვეო კლინიკასთან შუამდგომლობა სთხოვა.
დღეს აჭარის ჯანდაცვის მინისტრის მოადგილეები სამედიცინო ცენტრში, თამაზ ირემაძეს, მედპერსონალს შეხვდნენ და პრობლემის შესახებ ადგილზე მოისმინეს.
როგორც ცენტრის დირექტომა განაცხადა, თამარის დასახლების მცხოვრებთა დიდი ნაწილი სახელმწიფო პროგრამებით სარგებლობს, რომელშიც შედის სადაზღვეო პროგრამები 0-დან 6 წლამდელთა და პენსიონერებისათვის. აღნიშნულ პროგრამაში ჩართულ სამედიცინო პერსონალს კი 6 თვეა არ მიუღია ანაზღაურება. დღევანდელი მონაცემებით საოჯახო მედიცინის ცენტრის წინაშე „ჩემი ოჯახის კლინიკას“ 12 470 ლარი დავალიანება აქვს.
თამაზ ირემაძე: „გასულ წელს „ალდაგი ბი-სი-აიმ“ დაფინანსების შესრულება გადასცა „ჩემი ოჯახის კლინიკას“. გავაფორმეთ მასთან ხელშეკრულება, რომლის საფუძველზეც ის სულადობრივად დააფინანსებდა აღნიშნულ პროგრამაში მონაწილე 1500 ბენეფიციარს. პირველ ეტაპზე ხდებოდა თანხების რეგულარული გადმორიცხვა შესრულებული სამუშაოს მიხედვით. თუმცა, სექტემბრიდან კომპანიას დღემდე თანხა აღარ გადმოურიცხია“.
ლევან გორგილაძის განცხადებით, მსგავსი პრობლემების შესახებ კლინიკები სამინისტროს ხშირად მიმართავენ: „ასეთ შემთხვევაში ჩვენ სადაზღვეო კომპანიის წარმომადგენლობას ვუკავშირდებით. განვიხილავთ ამ საკითხებს და ადამიანური, მეგობრული თუ საქმიანი ურთიერთობების შემდეგ ვაღწევთ შეთანხმებას. ვფიქრობ, საკითხი უახლოეს მომავალში გადაწყდება და მოლაპარაკების გზით სამედიცინო ცენტრი სადაზღვეო კომპანიისგან მიიღებს დავალიანების ანაზღაურებას“.
