კომპანია სასამართლოს სთხოვს, ამ პირებმა მათ მიერვე ცოტა ხნის წინ გავრცელებული ინფორმაცია უარყონ.
ნანული გორაძე 2013 წლის 13 ივლისამდე „ბუგატოში” დამლაგებლად მუშაობდა. კომპანიის დირექტორმა ონურ ქურთმა ის სამსახურიდან დაითხოვა. ნანული გორაძე მიიჩნევს, რომ კომპანიის ხელმძღვანელობამ ის რელიგიური მრწამსის შეცვლის გამო, ქრისტიანად მონათვლისთვის გაათავისუფლა. ნუნუ გორაძის ბრალდება ვიდეოს სახით „იუთუბზეც” გავრცელდა. კიდევ ერთ ვიდეოში ნანული გორაძის ქალიშვილი – ნინო ლორთქიფანიძე ასევე დედის რელიგიური ნიშნით დევნაზე საუბრობს.
ამ ინფორმაციის გავრცელებისთანავე ხიჭაურის უნივერსიტეტში რამდენიმე ასეული ადამიანი შეიკრიბა. მათ სახელმწიფოს მოუწოდეს, ქვეყანაში მართლმადიდებლების დევნა არ დაუშვან. გამომსვლელთა შორის ეპისკოპოსი სპირიდონიც იყო.
სასამართლომ რვა მოწმე დაკითხა.
„ბუგატოს” თანამშრომელმა თემურ უსტიაძემ, რომელიც მოწმის სახით დაკითხა სასამართლომ, თქვა, რომ ნანული გორაძე სამსახურიდან დაკისრებული მოვალეობის ჯეროვნად ვერ შესრულებისა და თანამშრომლებთან კონფლიქტური ურთიერთობის გამო დაითხოვა დამსაქმებელმა, სანაცვლოდ კი იმავე კომპანიაში ექთნის სამუშაო შესთავაზა.
ჰესების მშენებარე კომპანიის წარმომადგენლები მოითხოვენ, რომ მხარემ უარყოფის ინფორმაციაც იმავე ფორმით გაავრცელოს, რა ფორმითაც რეპუტაციის შემლახავი ინფორმაცია გაავრცელა.
ნანული გორაძემ, ნინო ლორთქიფანიძემ და ნუგზარ ლორთქიფანიძემ უარყვეს კომპანიის ინტერესების დამცველთა მოსაზრება, რომ თითქოს მათ კომპანიის რეპუტაცია შელახეს.
საქმეს მოსამართლე ლეილა გურგუჩიანი განიხილავს. კომპანიის ინტერესებს ადვოკატი ირაკლი შავაძე და „ბუგატოს~ იურისტი რენა ფერცელიძე იცავენ, მოპასუხე მხარის უფლებებს კი – მზია შავაძე და ია შალამბერიძე.
მომდევნო სასამართლო პროცესი 14 მარტს 14 საათზე შედგება. სასამართლო განიხილავს მტკიცებულებას და გაიმართება მხარეთა პაექრობა.
