ამ წუთებში აგროსერვის ცენტრის ქობულეთის ფერმერთა მომსახურების სერვისცენტრში, ჰოლანდიური კომპანიების „ბილანსია“-სა და „ფრანსენ როუზის“ ხელმძღვანელები ფერმერებს ხვდებიან. ისინი ჰოლანდიაში მებაღეობისა და მეყვავილეობის კუთხით არსებული მდგომარეობის შესახებ ისაუბრებენ და ამ კუთხით აჭარაში არსებულ მდგომარეობას გაეცნობიან.
შეხვედრის მთავარი მიზანი ჰოლანდიაში მებაღეობისა და მეყვავილეობის კუთხით არსებული გამოცდილების, ცოდნისა და შესაძლებლობების ფერმერთათვის გაზიარებაა, რათა სამომავლოდ ერთობლივი პროექტები დაიგეგმოს, რაც ხელს შეუწყობს იმ მებაღეების მიერ წარმოებული პროდუქციის რაოდენობის გაზრდას, ხარისხის გაუმჯობესებასა და დისტრიბუციას, რომლებიც ამ კომპანიებთან თანამშრომლობას გადაწყვეტენ. ძირითადად კი საუბარი აჭარაში ბოსტნეულის სასათბურე მეურნეობის განვითარებისა და პერსპექტივების შესახებ გაიმართება.
კომპანია „ბილანსია“ არის ორგანიზაცია, რომელიც სოფლის მეურნეობაში უზრუნველყოფს სხვადასხვა სახის პროექტებისა და ტრენინგების ზედამხედველობას, ასევე კვალიფიციური, გამოცდილი სპეციალისტების ჩართვას პროექტებში, რომლებიც შემდგომ პასუხისმგებელნი არიან, პროექტით გათვალისწინებული პროდუქციის მოყვანასა და გაზრდაზე. რაც შეეხება, კომპანია “ფრანსენ როუზის“, ის ფლობს ულტრათანამედროვე ვარდების სათბურს ჰოლანდიაში, სადაც 1980 წლიდან მსოფლიოში ცნობილ Red Naomi (წითელი ნაომის) სახეობის ულამაზეს ვარდს აწარმოებენ.
შეხვედრას სასათბურე მეურნეობებით დაინტერესებული ფერმერები, ქობულეთის გამგეობის, აგროსერვის ცენტრისა და აჭარის სოფლის მეურნეობის სამინისტროს წარმომადგენლები ესწრებიან.
