Batumelebi | ბათუმში საშაურმე დახურეს და 1000 ლარით დააჯარიმეს ბათუმში საშაურმე დახურეს და 1000 ლარით დააჯარიმეს – Batumelebi
RU | GE  

ბათუმში საშაურმე დახურეს და 1000 ლარით დააჯარიმეს


სურსათის უვნებლობის სამსახურმა ბათუმში, ჭავჭავაძის ქუჩის 7 ნომერში მდებარე საშაურმედან ნიმუშები აიღო და ლაბორატორიული კვლევის შედეგად დაასკვნა, რომ იმ შაურმის მზა პროდუქტში, რომლითაც გასულ კვირას 21 ადამიანი მოიწამლა, უსაფრთხოების ხარისხი დარღვეული იყო.

 

ჩვენ ვერ ვიტყვით, კონკრეტულად რომელი ინგრედიენტი იყო დაბინძურებული. ლაბორატორიული კვლევის შედეგად მზა შაურმის კერძში მეზოფილების, აერობების და ფაკულტატური ანაერობების ზღვრულად დასაშვებ ნორმაზე სამჯერ მეტი რაოდენობა აღმოჩნდა. პროდუქტი ასევე შეიცავდა ნაწლავის ჩხირის ბაქტერიებს, კოლიფორმებს. კანონის მიხედვით, 65 მუხლის პირველი ნაწილის თანახმად, ობიექტი 1000 ლარით დაჯარიმდა, რაც მავნე სურსათის ბაზარზე განთავსებას გულისხმობს“-განუმარტა „ბათუმელებს“ აჭარის სურსათის უვნებლობის სამსახურის წარმომადგენელმა, კვების ჰიგიენისტმა თამარ ბერძენიშვილმა.


თამარ ბერძენიშვილის თქმით, ობიექტი დახურულია და თუკი სამომავლოდ, კვების ობიექტებთან დაკავშირებულ კანონმდებლობის ნორმებს დაააკმაყოფილებს, მას ისევ შეეძლება მუშაობის გაგრძელება.


რაც შეეხება ქალაქში არსებულ სხვა საშაურმეებს, აჭარის სურსათის უვნებლობის სამსახური დღეიდან მათ რეგულარულ შემოწმებას აპირებს.


გასულ კვირას მოწამლულმა ოცდაერთმა ადამიანმა სამედიცინო გამოკვლევა გაიარა და მათ სიცოცხლეს საფრთხე არ ემუქრება.


 

ნეტგაზეთის მასალების სხვა გამოცემებში გადაბეჭდვის წესი
ნინო ხიმშიაშვილი