Batumelebi | ფონდ „სოხუმსა“ და ბათუმის საკრებულოს შორის მემორანდუმი გაფორმდა ფონდ „სოხუმსა“ და ბათუმის საკრებულოს შორის მემორანდუმი გაფორმდა – Batumelebi
RU | GE  

ფონდ „სოხუმსა“ და ბათუმის საკრებულოს შორის მემორანდუმი გაფორმდა

 

 

კულტურულ-ჰუმანიტარულმა ფონდმა „სოხუმმა“ ბათუმის საკრებულოს სხდომათა დარბაზში პროექტი „გენდერული საკონსულტაციო საბჭო  – გაუმჯობესებული პერსპექტივები, ქალთა უფლებების განმტკიცება და რეგიონის ეფექტური მართვა“ წარმოადგინა. 

 

 

სხდომაზე ქალთა უფლებების გაძლიერებაზე ისაუბრეს. ფონდმა თანამშრომლობის მემორანდუმი გააფორმა ბათუმის საკრებულოსთან, რომელიც მომავალში განსაზღვრავს ვალდებულებებს გენდერულ პოლიტიკაში, რომელსაც ხელს შეუწყობს გენდერული საკონსულტაციო საბჭო. ფონდმა მსგავსი მემორანდუმი გააფორმა ქუთაისის და ოზურგეთის საკრებულოებთანაც.

 

 

მემორანდუმს ხელი ბათუმის საკრებულოს თავმჯდომარემ ირაკლი ჩავლეიშვილმა და ფონდ „სოხუმის“ ხელმძღვანელმა ალლა გამახარიამ მოაწერეს. ირაკლი ჩავლეიშვილმა აღნიშნა, რომ ამ ფონდთან თანამშრომლობა ქალაქისთვის მნიშვნელოვანია და საკრებულო მზადაა მხარი დაუჭიროს მათ ინიციატივებს.

 

 

ფონდი „სოხუმი“ ქალების უფლებების დაცვის და მათი საზოგადოებრივ საქმიანობაში, მმართველობაში ჩართვის კუთხით მომუშავე ორგანიზაციაა. მასში გაერთიანებული არიან აფხაზეთიდან იძულებით გადაადგილებული ქალები. ფონდი 1997 წელს დაარსდა ქუთაისში.  

ნეტგაზეთის მასალების სხვა გამოცემებში გადაბეჭდვის წესი
ნინო ხიმშიაშვილი