ბათუმის 27-ე საჯარო სკოლაში სასწავლო პროცესი წელს არ განახლებულა. 200-მდე მოსწავლეს სწავლა ონლაინ უწევს.
„დისტანციურზე ვართ 15-იდან პირველ ოქტომბრამდე“- ამბობს სკოლის დირექტორი ლელა გათენაძე „ბათუმელებთან“.
მისი თქმით, სკოლა სარემონტოა, სარეაბილიტაციო სამუშაოები კი სწავლის დაწყებამდე ვერ დასრულდა. დირექტორი ამბობს, რომ მოსწავლეებმა და მშობლებმაც იცოდნენ, რომ სწავლა ახალ სასწავლო წელს სკოლაში არ განახლდებოდა.
„დამრიგებლებმა ჩაატარეს კრებები ყველა კლასში და არსებობს ამის ოქმები და გაგებით შეხვდნენ, რომ 15 დღე ონლაინ ვიქნებოდით“- ამბობს დირექტორი.
დღეს, 24 სექტემბერს ადგილზე მისულ „ბათუმელებს“ სკოლაში სარემონტო სამუშაოები დახვდა. სამსართულიანი სკოლის საკლასო ოთახებში ახლა მიმდინარეობს ჭერის და კედლების შეკეთება. ოთახები სარემონტო მტვრითაა დაფარული.
სკოლის დირექტორი ამბობს, რომ სასწავლო პროცესი პირველ ოქტომბერს განახლდება სკოლაში, თუმცა აშკარაა, რომ დღეს არსებული მდგომარეობა, ამის საფუძველს ნაკლებად იძლევა.
„მესამე სართულის ჭერი იყო საგანგაშო, ბზარები ჰქონდა და შესაკეთებელი იყო, თუმცა რემონტი სამივე სართულზე მიმდინარეობს.
სკოლის ავტორიზაციის საბჭოს დასკვნა რომ მოვიდა, შემდეგ დავიწყეთ, მათ გვითხრეს რომ არ შეიძლებოდა აქ ბავშვების შემოყვანა. იატაკს პრობლემა არ აქვს, იყო ექსპერტი და შეამოწმა, მაგრამ სადაც დაზიანებულია, იქ შევცვლით“ – ამბობს სკოლის დირექტორი.
მისი თქმით, სკოლაში ჭერის დაზიანება გამოიწვია იმან, რომ დაზიანებული სახურავიდან შენობაში წყალი ჩადიოდა.
რამდენი ხანი იყო სკოლა ასეთ მდგომარეობაში? – ვკითხეთ მას. დირექტორი დეტალებს არ აზუსტებს, თუმცა ამბობს, რომ „დიდხანს არა“. მისი თქმით, სახურავის შეკეთებაც წელს მოხდა.
დირექტორს ვკითხეთ, თუ რატომ არ დაიგეგმა სარემონტო სამუშაოები იმ დროს, როცა სკოლაში არდადეგები იყო. ლელა გათენაძე ამბობს, რომ სამუშაოები ზაფხულში დაიწყეს, მაგრამ ვერ მოასწრეს.
მისი თქმით, სარეაბილიტაციო სამუშაოებისთვის თანხა განათლების სამინისტროს ბიუჯეტიდან არის გამოყოფილი, თუმცა არ ფლობს დაზუსტებულ ინფორმაციას, სამუშაოები ტენდერით ტარდება თუ უტენდეროდ. „ტენდერით იქნება, ალბათ“- გვითხრა დირექტორმა.
სკოლის დირექტორის თქმით, სკოლაში არ არის კვების ბლოკი და მოსწავლეებს ძირითადად ცომეულის შეძენა უწევთ კერძო პირებისგან. „არ არის მაღალკონტინგენტიანი სკოლა და არ უღირთ, რომ გახსნან კვების ბლოკი. მოაქვთ მზა საკვები, ძირითადად უზეთოდ მომზადებული და ყიდულობენ ბავშვები“ – ამბობს დირექტორი.
2026 სასწავლო წელს, საქართველოს სხვადასხვა რეგიონში სწავლა ათზე მეტ სკოლაში ვერ განახლდა.
ბათუმის გარდა სასწავლო პროცესი 15 სექტემბერს ვერ განახლდა ხაშურის, წყალტუბოს, სენაკის, ზესტაფონის, ნიჩბისის, ალისუბნის, შუხუთის და სხვა საჯარო სკოლებში. სამაგიეროდ, განათლების სამინისტრომ 49 მილიონი ლარი დახარჯა სასკოლო ფორმებზე, რომლის აუცილებლობაც არ დამდგარა. მშობლებს კი სულ ცოტა 90 ლარის გადახდა მოუწიათ ფორმაში, რომლის დაკვეთაც მათი მხრიდან არ ყოფილა.
ამავე თემაზე: ათზე მეტი სკოლაა, სადაც სწავლა დაიწყო და შემდეგ შეჩერდა
მოსწავლეების და მშობლების დაკვეთაა ბავშვები სწავლობდნენ უსაფრთხო, ადაპტირებულ, თანამედროვე ტექნოლოგიებით აღჭურვილ და გამართულ სკოლებში, სადაც ხარისხიანი განათლების მიღება იქნება შესაძლებელი. ფაქტია, რომ ამ დაკვეთას განათლების სამინისტრო ვერ ასრულებს.
ვიდეო:
