„დაირიცხა სოციალურები თუ არა?“ – ყოველი თვის 20 რიცხვში ეს არის კითხვა, რომელიც სოციალურად დაუცველთა მიერ შექმნილ ფეისბუქ ჯგუფებში იწერება.
ათასობით სოციალურად დაუცველი, რომელიც გადამოწმებაში მოჰყვა, სწორედ 20 რიცხვში იგებს, რომ სოცდახმარების გარეშე დარჩა.
„არ დამერიცხა, სად გავარკვიო, რატომ არ დაირიცხა?“ – კითხულობს ერთი მოქალაქე.
„3 აგვისტოს მოვიდა ქულა, შეგვამოწმეს, არ დამრიცხვია, ნეტავ რატომ?“ – კითხულობს მეორე მოქალაქე.
„მე არ დამრიცხვია, ყოველ 20 რიცხვში მერიცხებოდა ხოლმე, მხოლოდ ბავშვი იღებს, ოჯახის სხვა წევრები არა,“ – ამბობს კიდევ ერთი.
„არც მე დამერიცხა. მესამე თვეა შეჩერებული მაქვს, არადა როგორი იმედი მქონდა,“ – წერს კიდევ ერთი.
„დაირიცხა და დაიხარჯა“ – წერს კიდევ ერთი მოქალაქე.
მსგავსი კომენტარები ასობითაა.
სოციალური მომსახურების სააგენტოს მიერ გამოქვეყნებული ოფიციალური სტატისტიკის მიხედვით, ბოლო 7 თვეში სააგენტომ სოციალური დახმარება 133 324 ადამიანს შეუწყვიტა.
დღეს, 21 აგვისტოს, დამოუკიდებელმა პოლიტიკოსმა ქალმა, თეონა ჭალიძემ განცხადებით მიმართა სახალხო დამცველს და მოითხოვა, რომ მონიტორინგი გაუწიოს სოციალურად დაუცველთა „ბაზის გაწმენდას“ რომელსაც სოციალური მომსახურების სააგენტო ახორციელებს.
„სოციალური მომსახურების სააგენტომ ინტენსიური გადამოწმებების შედეგად მიმდინარე წელს საარსებო შემწეობა მოუხსნა 133 324 ადამიანს, რაც იმას უნდა ნიშნავდეს რომ თითქოს 39 530 ოჯახის სოციალურ-ეკონომიკური მდგომარეობა გაუმჯობესდა… ამ სტატისტიკაში არ შედიან ის პირები, რომლებსაც საარსებო შემწეობის ოდენობა შეუმცირდათ, რადგან ზოგს გადამოწმების შედეგად სარეიტინგო ქულა გაეზარდა იმდენად რომ საარსებო შემწეობა შეუნარჩუნდა, მაგრამ თანხის ოდენობა შეუმცირდა.
პროგრამას ისედაც არაერთი ხარვეზი აქვს, რეალურად მძიმე მდგომარეობაში მყოფ მოქალაქეებს ვერ ხედავს და საბაზისო დახმარების გარეშე ტოვებს, ამიტომ ზოგი განაცხადსაც კი აღარ აკეთებს, რადგან იმედი აღარ აქვს,“ – ამბობს თეონა ჭალიძე.
თეონა ჭალიძის თქმით, სოციალურ შემწეობას უხსნიან ისეთ ოჯახებს, რომლებსაც არასრულწლოვანი ან შშმ ბავშვები ჰყავთ.
სოცდახმარების მოხსნის მიზეზთა შორის არის, მაგალითად, ზამთარში მაღალი კომუნალური გადასახადის გადახდა.
„უსამართლოა ის, რომ სოციალური შემწეობის მოხსნის ერთ-ერთი მიზეზი არის ზამთარში კომუნალური გადასახადის ოდენობა. სოფლად მცხოვრებ ადამიანს შეშის ყიდვა ძვირი უჯდება, ერთიანად ვერ ყიდულობს, ამიტომ ბუნებრივ აირს მეტს მოიხმარს და ამას არავინ ითვალისწინებს… არც იმას ითვალისწინებენ, რომ ზოგს ბუნებრივი აირი საერთოდ არ აქვს და შესაბამისად, ელექტროენერგიას უფრო მეტს მოიხმარს ზამთარში.
არის შემთხვევები, როცა მოქალაქეები ამბობენ, რომ დეკლარაცია არასწორად შეუვსეს და ზოგიერთი სოციალური აგენტი ვარაუდით ავსებს ფორმას.
სოციალური მომსახურების სააგენტო კი, საზოგადოებასთან ამ მასშტაბური „ბაზის წმენდის“ შესახებ დეტალურ ახსნა-განმარტებას არ აკეთებს, თუ რა კონკრეტული საფუძვლებით მოხდა ამდენი პირისთვის საარსებო შემწეობის შეწყვეტა,“ – ამბობს თეონა ჭალიძე.
იგი ხაზს უსვამს იმასაც, რომ ათობით მოქალაქეს პრეტენზია აქვს სოციალური აგენტების მუშაობასთან დაკავშირებით და ეჭვობენ, რომ სოცაგენტები ხელმძღვანელობისგან არაფორმალური მითითებებით მოქმედებენ, რომ „რაც შეიძლება მეტ ადამიანს შეუწყვიტონ ან შეუმცირონ საარსებო შემწეობა“.
„მნიშვნელოვანია, რომ სახალხო დამცველმა შეისწავლოს საარსებო შემწეობის შეჩერება – შეწყვეტასთან დაკავშირებული კონკრეტული მავნე პრაქტიკები და გასცეს შესაბამისი რეკომენდაციები.
მივმართავ სახალხო დამცველს, რომ მონიტორინგი გაუწიოს ამ პროცესს და შეისწავლოს, რამდენად სამართლიანად ხდება „ბაზის გაწმენდა“, როგორც თავად უწოდებენ სოციალური მომსახურების სააგენტოში. ამ „ბაზის გაწმენდაზეა“ დამოკიდებული ბევრი ადამიანის ყოველდღიური ყოფა და ბრძოლა გადარჩენისთვის.
სოციალური პროგრამების პოლიტიკური და საარჩევნო მიზნებისთვის გამოყენება უნდა შეწყდეს. ადამიანების გაჭირვებით მანიპულირება და სიღარიბის მაჩვენებელი სტატისტიკების ხელოვნური მართვა უნდა დასრულდეს,“ – ამბობს თეონა ჭალიძე.
სოციალური მომსახურების სააგენტოს მიერ გამოქვეყნებული ოფიციალური სტატისტიკის მიხედვით, სოცდახმარების მიმღებთა ოდენობა 2026 წლის თებერვლიდან მცირდება.
ამ შემცირების დაწყებას წინ უძღოდა ირაკლი კობახიძის განცხადება, რომელმაც თქვა, რომ „სოცდახმარების მიმღებთა ჭარბი რაოდენობა გადასახედი იყო“.
სოციალური მომსახურების სააგენტოს ოფიციალური სტატისტიკით, სოცდახმარების მიმღებთა რაოდენობა ბოლო შვიდ თვეში ასეთია:
- 2026 წლის იანვარში საარსებო შემწეობას იღებდა – 710 226 პირი (184 921 ოჯახი);
- 2026 წლის თებერვალი – 709 458 პირი (184 773 ოჯახი);
- 2026 წლის მარტი – 667 793 პირი (174 111 ოჯახი);
- 2026 წლის აპრილი – 645 920 პირი (166 841 ოჯახი);
- 2026 წლის მაისი – 605 033 პირი (153 171 ოჯახი);
- 2026 წლის ივნისი – 584 137 პირი (146 996 ოჯახი);
- 2026 წლის ივლისი – 576 902 პირი (145 391 ოჯახი).
ამავე თემაზე:
133 324 ადამიანს დახმარება შეუჩერეს – სოცსააგენტოს 7 თვის სტატისტიკა