წვიმის შემდეგ ბათუმის ძველ ბულვარში შედარებით ხალხმრავალ ადგილად შეიძლება ანბანის კოშკის მიმდებარე ტერიტორია მივიჩინოთ. აქ ტურისტები ჯგუფებად მოდიან, ძირითადად, ალი და ნინოს სანახავად.
აქვეა ეშმაკის ბორბალი და ზღვაზე გადამდგარი პირსიც, თუმცა, როგორც ჩანს, მათ ინტერესს მაინც უფრო ალისა და ნინოს მოძრავი სკულპტურა იპყრობს.
ამ ტერიტორიაზე ათობით ქვეყნის წარმომადგენელს შეხვდებით და ამდენივე ენაზე წარმოთქმულ ფრაზებსაც მოისმენთ.
ყველაზე შემაწუხებელი აქ იახტკლუბიდან მომავალი ხმაა, რაც იახტების გაქირავების, გემით გასეირნების შეთავაზებას უკავშირდება. გარდა ამისა, ყველა იახტაზე ძალიან ხმამაღლა აქვთ მუსიკა ჩართული.
გემით 15-წუთიანი გასეირნების ფასი ერთი ტურისტისთვის 30 ლარია.
რამდენადაც ხალხმრავალია, იმდენად ნაკლებად სუფთაა პრომენადი ალი და ნინოს მიმდებარედ. აქა-იქ ჭუჭყიან გუბესაც შეხვდებით, თუმცა ყველაზე დიდი პრობლემა და კანონდარღვევაც, რასაც ამ ტეროტირიაზე ნახავთ, მაინც ავტომანქანით მოძრაობაა.
მიუხედავად იმისა, რომ აქ ხშირად შეხვდებით ბულვარის ადმინისტრაციის წარმომადგენელს სპეციალური მანქანით, ან დაცვის თანამშრომელს, როგორც ჩანს, გარემოს ისე ვერ აკონტროლებენ, როგორც ევალებათ.
ავტომანქანა ძველ ბულვარში „ბათუმელებმა“ დღეს, 17 აგვისტოსაც დააფიქსირა.
ამ ტერიტორიაზე სასმელი წყლის ონკანები რიგ შემთხვევებში არ მუშაობს, ურნები გადავსებულია ან გადავსებული არ არის, მაგრამ მძაფრი სუნი აქვს. როგორც ჩანს, ურნები ინტენსიურად არ ირეცხება.
მართალია, ვერტმფრენით დაფრენა კორპუსის თავზე უკვე შესაძლებელია, თუმცა „ამბასადორის“ სასტუმრო ჯერ კიდევ მშენებარეა.
ძველი ბულვარის შესასვლელში, სადაც ადრე ქორწინების სახლი იყო, უკვე დაუსრულებიათ ახალი შადრევნის მოწყობა. რაც შეეხება სკვერს კაფე „ტყუპების“ ადგილზე, სამუშაოები ჯერ არ დასრულებულა.
