ბათუმის საქალაქო სასამართლოში დღეს, 17 აგვისტოს, განახლდა საქმის განხილვა, რომელიც მკვლელობის მცდელობას შეეხება.
„მითხრა, რომ კონფლიქტი ჰქონდა, რა ვალი ჰქონდა, არ ვიცი… ამბობდა, მირეკავენ და მაწუხებენო,“ – უთხრა მოსამართლე ვიქტორ მეტრეველს სასამართლოში მოწმის სახით დაბარებულმა – მალხაზ ალტეიბამ. ის მკვლელობის მცდელობის საქმეზე გამოკითხეს.
ეს მოწმე მდინარე ჭოროხში სავარაუდოდ გადაგდებულ კაცთან მეგობრობდა – მშენებლობაზე ერთად მუშაობდნენ. მალხაზ ალტეიბა აფხაზეთიდანაა და ბოლო რამდენიმე წელია ცხოვრობს ბათუმში. მან რუსულ ენაზე მისცა ჩვენება სასამართლოს თარჯიმნის დახმარებით.
საუბარია 2025 წლის 10 დეკემბერს მომხდარ შემთხვევაზე: პროკურატურის ვერსიით, მამა-შვილმა, შურისძიების მიზნით, დაზარალებულად მიჩნეული პირი ავტომანქანაში ჩაისვეს და მდინარე ჭოროხზე, გაუქმებული ხიდიდან დღის საათებში გადააგდეს.
2025 წლის 10 დეკემბრიდან დღემდე სტანისლავ სუხარევი, რომელიც 40 წლისაა და გამოძიებამ დაზარალებულად მიიჩნია, არავის უნახავს. არც მისი ცხედარი უპოვია გამოძიებას. პროკურატურის მტკიცებით, კაცი ბრალდებულმა მამა-შვილმა მოკლა.
გაუჩინარებული კაცის, სტანსილავ სუხარევის ყოფილ მეუღლეს – ინგა უზუნოვას პროკურატურის ვერსიის სჯერა. მან 2026 წლის 27 ივლისის სასამართლო სხდომის შემდეგ „ბათუმელებს“ უთხრა, რომ მისი ყოფილი ქმარი, ვისთანაც საერთო 12 წლის შვილი ჰყავს, „520 ლარის გამო მდინარეში გადააგდეს, როგორც ქვა“. მისთვის უცნობია, რის გამო ჩაურიცხეს სტანისლავს ფული.
მოწმის თქმით, მან ამ ინციდენტამდე სტანისლან სუხარევს საკუთარი მობილური ტელეფონი ათხოვა: თავისი გაუფუჭდა და ვიცოდი, მუსიკის მოსმენა რომ უყვარდაო.
„რადგან სტანისლავი ქართულად კარგად საუბრობს, ახლობლის პროცესზე უნდა მოსულიყო 10 დეკემბერს აქ, სასამართლოში, რომ დაგვხმარებოდა,“ – ეს ის დღეა, როცა პროკურატურის ვერსიით, სტანსილავი სავარაუდოდ ჭოროხში გადააგდეს გონიოს გაუქმებული ხიდიდან, – „დაპირების მიუხედავად, სტანილსავი სასამართლოში არ მოვიდა. დავუწყე ტელეფონზე რეკვა, არ პასუხობდა… ვიფიქრე, თავისით გამოჩნდება-მეთქი.
მერე დამირეკა სტანისლავის ბინის მესაკუთრემ – სვეტლანამ, რომ მას ეძებდნენ, ცემეს და ისე წაიყვანეს სადღაც.
ესენი პირველად პოლიციის განყოფილებაში ვნახე,“ – ბრალდებული მამა-შვილისკენ მიუთითა მოსამართლეს მოწმემ.
„ის რამე ნივთიერებაზე დამოკიდებული იყო?“ – ჰკითხა მოწმეს პროკურორმა პაატა ცეცხლაძემ.
„მას უყვარდა ალკოჰოლის დალევა… კონკრეტული ნარკოტიკის მოხმარება მე არ დამინახავს,“ – აღნიშნა მოწმემ.
ერთ-ერთი ვერსიით, თანხა სტანისლავ სუხარევს თანხა ნარკოტიკული ნივთიერების შესაძენად ჩაურიცხეს. ამ ვერსიაზე ჯერჯერობით პროკურატურა მოწმეების დაკითხვის დასრულებამდე არ საუბრობს.
„თქვენ უკვე 14 დეკემბერს იცოდით, რომ, ასე ვთქვათ, ცემა-ცემა წაიყვანეს თურმე სტანისლავი ბინიდან ვინმე ბადრიმ და როლანდიმ. ეს არ იყო შემაშფოთებელი?“ – მიმართა მოწმეს ამჯერად ბრალდებულების ადვოკატმა, მიხეილ მიქანაძემ.
„ვფიქრობდით, ალბათ სადმე დალია და გამოჩნდება-მეთქი,“ – მოკლედ თქვა მოწმემ.
დაცვის მხარის ვერსიით, გაუჩინარებული კაცის ახლობლებმა კონფლიქტი ბადრი და როლან უ-ებს, ანუ ბრალდებულებს მას შემდეგ დაუკავშირეს, როცა პროკურატურამ მათ ბრალი წარუდგინა. ამიტომაც გაამახვილა ყურადღება ადვოკატმა ამ დეტალზე: თუკი ოჯახისთვის და მეგობრისთვის ცნობილი იყო, რომ სტანისლავ სუხარევი „ცემა-ცემით წაიყვანეს სახლიდან“, მაშინ რატომ არ დაურეკეს მაშინვე პოლიციას და დაელოდნენ, სტანისლავი თავისით როდის გამოჩნდებოდა?
„ჩვენ სხვადასხვა ვარიანტებს განვიხილავდით,“ – დასძინა მოწმემ.
მისივე თქმით, სტანისლავის დედამ პოლიციის განყოფილებაში თქვა, რომ განყოფილებაში ნანახი მამა-შვილი „შესაძლებელია ჰგავდეს“ იმ პირებს, რომლებმაც 10 დეკემბრის დილით ბინიდან სტანისლავი გაიყვანეს.
„წამლის ბარიგა“ – წამოიძახა უცებ მკვლელობის მცდელობაში ბრალდებულმა ხანდაზმულმა კაცმა. მანამდე მას პროკურორი გაუწყრა, რას იშვერ ხელსო და მოსამართლემ შენიშვნა მისცა.
„შემთხვევის ადგილზე იყო ხელის მოსაკიდებელი, რომ ადამიანი ჩასჭიდებოდა?“ – ჰკითხა მოწმე ომარ სურმანიძეს ადვოკატმა პაატა ცეცხლაძემ. ომარ სურმანიძე მაშველია და 21 დეკემბერს გონიოს გაუქმებული ხიდის მიმდებარე ტერიტორია სხვებთან ერთად ნავით დაათვალიერა.
„მე ნავს ვმართავდი, მყვინთავები ჩავიდნენ წყალში,“ – აღნიშნა მოწმემ, ხოლო ადვოკატს უპასუხა, რომ მდინარის ორივე მხარეს იყო „ზოგან ხე, ზოგან – ბუჩქებიც“.
„შეთხელებული წყალი სადაც იყო, კუნძულთან, იქ გადასვლა შესაძლებელი იყო?“ – ჰკითხა მაშველს ადვოკატმა მიხეილ მიქანაძემ.
„მე გადავიდოდი“, – ადვოკატებს ნახევრად ღიმილით გამოხედა მოწმემ.
ამ კითხვა-პასუხით ადვოკატები ცდილობენ იმის წარმოჩენას, რომ გაუქმებული ხიდიდან მდინარე ჭოროხში კაცი რომც გადაეგდო ვინმეს, ის თავის გადარჩენას შეძლებდა – დადგენილია, რომ გაუჩინარებულმა კაცმა ცურვა კარგად იცოდა.
„გონიოს ძველ ხიდთან ჩავუშვით ნავი – ზღვის შესართავამდე ჩავატარეთ სამძებრო სამუშაოები, საეჭვო არაფერი შემხვედრია,“ – დაასრულა მოწმემ.
მკვლელობის მცდელობის არსებითი განხილვა გრძელდება.
ამ თემაზე:
„გაუქმებულ ხიდთან მიიყვანეს და ჭოროხში გადააგდეს“ – მკვლელობის საქმე ბათუმის სასამართლოში